უკრაინის პრეზიდენტმა, ვოლოდიმირ ზელენსკიმ, ვრცელ ვიდეომიმართვაში განაცხადა, რომ ქვეყანა ისტორიის ერთ-ერთი ყველაზე მძიმე ეტაპს გადის და შესაძლოა რთული არჩევანის წინაშე აღმოჩნდეს – „ან ღირსების დაკარგვა, ან ძირითადი პარტნიორის დაკარგვის რისკი“. მისი თქმით, ამ დროს კიევზე „ერთ-ერთი ყველაზე მძიმე ზეწოლა ხორციელდება“.
ზელენსკის განცხადებით, უკრაინას ახლა უწევს ბრძოლა როგორც ფრონტზე, ისე დიპლომატიურ მიმართულებებზე. „ჩვენ რამდენიმე ათას კილომეტრიან ფრონტს ვამაგრებთ და ვინარჩუნებთ. ხალხი ყოველ ღამე დაბომბვებს უძლებს. უკრაინელებს ძალიან უნდათ, რომ ეს ომი სამართლიანად დასრულდეს,“ – აღნიშნა პრეზიდენტმა.
მან ხაზი გაუსვა, რომ ხელისუფლებასა და პოლიტიკურ ძალებს შორის საჭიროა ერთობა:
„მივმართავ ყველას – ხალხს და პოლიტიკოსებს – საჭიროა შევიკრიბოთ და შევწყვიტოთ დაპირისპირება. ჩვენ არ ვუღალატეთ უკრაინას 2022 წლის 24 თებერვალს და არც ახლა ვუღალატებთ.“
ზელენსკის თქმით, მომავალი დღეები რთული და მოვლენებით დატვირთული იქნება:
„დიდი ზეწოლა იქნება. მტერი არ ისვენებს. ჩვენ მშვიდად ვიმუშავებთ ამერიკასთან და ყველა პარტნიორთან. შევთავაზებ ალტერნატივებს, მაგრამ არ მივცემთ მტერს საბაბს, თქვას, რომ უკრაინას მშვიდობა არ სურს“.
ამერიკული მედიის ინფორმაციით, რამდენიმე დღის წინ ვაშინგტონმა უკრაინას გადასცა ახალი სამშვიდობო გეგმის პუნქტები, რომლებიც მოიცავს რიგ კრიტიკულ პირობებს:
• უკრაინის მხრიდან NATO-ში გაწევრიანებაზე უარის თქმას;
• რუსეთის მიერ ოკუპირებული ყირიმის, ლუგანსკისა და დონეცკის დე ფაქტო რუსულ ტერიტორიად აღიარებას;
• ხერსონისა და ზაპოროჟიეს რუსეთის კონტროლქვეშ მიღებას, არსებული ფრონტის ხაზის შესაბამისად.
ზელენსკი აცხადებს, რომ მიუხედავად ზეწოლისა, უკრაინის სუვერენიტეტი და დამოუკიდებლობა არ იქნება კომპრომისის საგანი.
