კლინიკა „მედინაში“ დაბადებული ახალშობილი, რომელსაც დაბადებისთანავე მძიმე დაზიანებები ჰქონდა, გარდაიცვალა.
როგორც ცნობილია, კლინიკის თანამშრომელმა საპირფარეშოში იმშობიარა, რის შემდეგაც დედამ ახალშობილს სიცოცხლისთვის შეუთავსებელი ჭრილობები მიაყენა.
კლინიკის ოფიციალური განცხადებით, ექიმები პაციენტის გადასარჩენად რამდენიმე დღის განმავლობაში იბრძოდნენ.
„მიუხედავად ექიმების მრავალდღიანი ინტენსიური ბრძოლისა და განხორციელებული ყველა შესაძლო სამედიცინო ღონისძიებისა, 23 თებერვალს, ირის ბორჩაშვილის ჯანმრთელობის ცენტრ „მედინაში“ დაბადებული ახალშობილი ამ დილით გარდაიცვალა,“ – აცხადებენ კლინიკაში.
მათივე ინფორმაციით, პაციენტის მდგომარეობა თავიდანვე უკიდურესად მძიმე იყო. პროცესში ჩართული იყვნენ როგორც კლინიკის, ისე მოწვეული მრავალპროფილური სპეციალისტები და ჩატარდა არაერთი გადაუდებელი სამედიცინო ჩარევა, თუმცა ბავშვის გადარჩენა ვერ მოხერხდა.
ცნობისთვის დაკავებულია დედა, რომელმაც შვილს დაზიანებები მიაყენა.
