საქართველოს სტატისტიკის ეროვნული სამსახურის მონაცემებით, 2026 წლის მაისში საქართველოში წინა თვესთან შედარებით ინფლაცია 0.3 პროცენტი იყო, ხოლო წლიურმა ინფლაციამ 5.7 პროცენტი შეადგინა. ამავე პერიოდში საბაზო ინფლაცია 3.8 პროცენტით განისაზღვრა, ხოლო თამბაქოს გარეშე წლიური საბაზო ინფლაცია 3.5 პროცენტით.
საქსტატის ინფორმაციით, მაისში ფასების ცვლილებაზე ყველაზე დიდი გავლენა ტრანსპორტის ჯგუფმა მოახდინა, ამ მიმართულებით ფასები ერთ თვეში 3.2 პროცენტით გაიზარდა. გაძვირდა პირადი ავტომობილების ექსპლუატაცია, სატრანსპორტო მომსახურება და სატრანსპორტო საშუალებების შეძენა.
მეორე მხრივ, სურსათისა და უალკოჰოლო სასმელების ჯგუფში ფასები თვიურად 0.6 პროცენტით შემცირდა. გაიაფდა ბოსტნეული და ბაღჩეული, ასევე რძე, ყველი და კვერცხი. თუმცა გაძვირდა ხილი, უალკოჰოლო სასმელები, ყავა, ჩაი, თევზეული და ხორცპროდუქტები.
ასევე, მაისში 3.2 პროცენტით შემცირდა კავშირგაბმულობის ჯგუფის ფასები. რაც შეეხება წლიურ ჭრილს, ინფლაციაზე ყველაზე დიდი გავლენა კვლავ სურსათისა და ტრანსპორტის მიმართულებით ფასების ზრდამ მოახდინა.
წლიურად:
- სურსათი და უალკოჰოლო სასმელები – 5.2%-ით გაძვირდა;
- ტრანსპორტი – 15.1%-ით გაიზარდა;
- საცხოვრებელი, წყალი, ელექტროენერგია და აირი – 7%-ით გაძვირდა;
- ალკოჰოლური სასმელები და თამბაქო – 7.2%-ით გაიზარდა;
- ჯანმრთელობის დაცვა – 5.1%-ით გაძვირდა.
სტატისტიკის თანახმად, სურსათის კატეგორიაში ყველაზე მაღალი ზრდა თევზეულზე, ხორცპროდუქტებზე და პურსა და პურპროდუქტებზე დაფიქსირდა, ხოლო ბოსტნეული წლიურ ჭრილში გაიაფდა.
