ბათუმში, აღმაშენებლის ქუჩის №18ზ-ში მდებარე მრავალბინიანი საცხოვრებელი კორპუსის მცხოვრებლები პირველ სართულზე მოქმედი თეთრეულის სამრეცხაოს საქმიანობას აპროტესტებენ. მათი განცხადებით, ობიექტის მუშაობა მათ ჯანმრთელობასა და საცხოვრებელ გარემოს პრობლემებს უქმნის.
ადგილობრივების თქმით, დანადგარების მუშაობისას საკვამურიდან გამოდის სპეციფიკური სუნის მქონე კვამლი, რომელიც კორპუსის თითქმის ყველა ბინის ფანჯარასთან აღწევს. მათი განცხადებით, ამის გამო მოსახლეობას ჯანმრთელობის პრობლემები შეექმნა და არაერთ შემთხვევაში სასწრაფო სამედიცინო დახმარების გამოძახებაც გახდა საჭირო.
მოსახლეობის თქმით, სამრეცხაოს ფუნქციონირებას უკვე ერთ თვეზე მეტია აპროტესტებენ. მათი განცხადებით, არაერთხელ მიმართეს შესაბამის სახელმწიფო და მუნიციპალურ სამსახურებს, თუმცა, როგორც ამბობენ, მათ შეტყობინებებს ამ დრომდე სათანადო რეაგირება არ მოჰყოლია.
„აჭარა თაიმსი“ ადგილზე იმყოფებოდა. თავდაპირველად ობიექტზე ხელმძღვანელობა არ დაგვხვდა, თანამშრომლებმა კი განაცხადეს, რომ არსებული პრობლემის მოსაგვარებლად მუშაობა მიმდინარეობს.
თემას მოგვიანებით გამოეხმაურა საწარმოს მფლობელიც. მისი განცხადებით, თეთრეულის სამრეცხაო ყველა მოქმედი სტანდარტის დაცვით ფუნქციონირებს. როგორც ამბობენ, ჰქონდათ მცდელობა, საკვამურები შესაბამის მოთხოვნებთან შეესაბამებინათ, თუმცა, მათი თქმით, ადგილობრივმა მცხოვრებლებმა ხელოსნებს სამუშაოების შესრულების შესაძლებლობა არ მისცეს.
საწარმოს მფლობელის განცხადებითვე, ობიექტი დღე-ღამის განმავლობაში უწყვეტ რეჟიმში არ მუშაობს. მათ ასევე უარყვეს გავრცელებული ინფორმაცია, თითქოს სამრეცხაოს მმართველი პარტიიდან მფარველები ჰყავდეთ.
ნახეთ, პირდაპირი ეთერის ჩანაწერი
