საქართველოს პროკურატურამ „კანონიერი ქურდობის“, „ქურდული სამყაროს“ წევრობის, „ქურდული სამყაროს“ საქმიანობის მხარდაჭერისა და „კანონიერი ქურდისთვის მიმართვის“ ფაქტებზე 43 პირს ბრალდება წარუდგინა.
შინაგან საქმეთა სამინისტროში ჩატარებული გამოძიებით დადგინდა, რომ ე.წ. „ქურდული სამყაროს“ წევრები და მათი მხარდამჭერები სისტემატურად აწყობდნენ სოგენანნტენ „ქურდულ გარჩევებს“, სადაც განიხილავდნენ მოქალაქეებს შორის ფინანსურ დავებს და გარკვეულ შემთხვევებში თანხების გამოძალვასაც ახორციელებდნენ.
გამოძიების თანახმად, ე.წ. „კანონიერმა ქურდმა“ თანამზრახველებს დაავალა, პენიტენციურ დაწესებულებაში მყოფი ერთ-ერთი ბრალდებულის მიმართ აღესრულებინათ „ქურდული გადაწყვეტილება“, რაც მის მიმართ სადამსჯელო მოქმედებებს გულისხმობდა.
მიმდინარე გამოძიების ფარგლებში სამართალდამცველებმა ასევე დაადგინეს, რომ სპეცოპერაციის დროს ლიკვიდირებულმა მირზა ალიევმა, რომელიც „ქურდული სამყაროს“ საქმიანობის მხარდამჭერი იყო, ე.წ. „ქურდულ საერთოში“ გადასახდელი თანხის შემცირების მიზნით, კრიმინალურ ავტორიტეტებს მიმართა. საკითხის მოსაგვარებლად გაიმართა მოლაპარაკებები და „გარჩევები“, რის შემდეგაც ალიევმა „ქურდული სამყაროს“ წევრებს 6000 აშშ დოლარი გადასცა.
საქმის ფარგლებში დაკავებულია 34 პირი, ექვსს ბრალდება დაუსწრებლად წარედგინა, ხოლო სამს – პენიტენციურ დაწესებულებაში. ბრალდებულებს ბრალად ედებათ:
- „ქურდული სამყაროს“ წევრობა,
- „კანონიერი ქურდობის“ ფაქტები,
- „ქურდული სამყაროს“ საქმიანობის მხარდაჭერა,
- „კანონიერი ქურდისთვის მიმართვა“,
- ცეცხლსასროლი იარაღის უკანონო შეძენა-შენახვა.
აღნიშნული დანაშაულები 15 წლამდე თავისუფლების აღკვეთას ითვალისწინებს. პროკურატურის შუამდგომლობის საფუძველზე, ბრალდებულთა ნაწილს აღკვეთის ღონისძიების სახით პატიმრობა შეეფარდა, ხოლო ერთ პირს, რომელმაც გამოძიებასთან ითანამშრომლა, გირაო 3000 ლარის ოდენობით განესაზღვრა.
