ნიკა გვარამიამ „ოპოზიციის ალიანსის“ სახელით 26 მაისს დაგეგმილ აქციასთან დაკავშირებით განცხადება გააკეთა და აღნიშნა, რომ მიუხედავად მერიისა და შინაგან საქმეთა სამინისტროს მხრიდან ტექნიკის, სცენისა და ეკრანების განთავსებაზე მიღებული უარისა, ოპოზიცია დაგეგმილ მარშრუტს არ შეცვლის.
გვარამიას თქმით, აქცია უკვე ორი თვეა დაანონსებულია და ხელისუფლებისთვისაც წინასწარ იყო ცნობილი. მისი განცხადებით, ოპოზიცია არ აპირებს დაემორჩილოს „ივანიშვილის რეჟიმის ანტიკონსტიტუციურ გადაწყვეტილებებს“.
„რუსთაველის გამზირი მოქალაქეებს ეკუთვნის და ისტორიულად პროტესტის გამოხატვის ადგილია. როგორც ლონდონში არსებობს ჰაიდ-პარკი, ისეა რუსთაველი თბილისში, ადგილი, სადაც საბჭოთა კავშირის ბოლო წლებში მნიშვნელოვანი პროცესები მიმდინარეობდა. ზუსტად რუსთაველზე დაიშალა საბჭოთა კავშირი და ჩვენც სწორედ მშვიდობიანი, პრინციპული პროტესტით ვაპირებთ რეჟიმის ჩამოშლას,“ – განაცხადა გვარამიამ.
მისივე თქმით, ოპოზიციის ალიანსი 26 მაისს, 19:00 საათზე, თბილისის სახელმწიფო უნივერსიტეტის პირველი კორპუსიდან დაიწყებს მსვლელობას და რუსთაველის გამზირისკენ გადაინაცვლებს. გვარამიამ აღნიშნა, რომ აქციის ორგანიზატორები ბოლომდე შეეცდებიან ტექნიკის შეტანასა და სრულფასოვანი აქციის ჩატარებას. ამასთან, მან ხელისუფლებას მოუწოდა, თავი შეიკავოს ნებისმიერი ტიპის ესკალაციისა და ინციდენტისგან.
„ჩვენი პროტესტი მშვიდობიანია და ემყარება მხოლოდ კონსტიტუციურ უფლებებს. პროცესებს აკვირდება როგორც საქართველოს საზოგადოება, ისე საერთაშორისო პარტნიორები,“ – თქვა გვარამიამ.
ცნობისთვის, ოპოზიციურმა ალიანსმა 31 მარტს ეროვნული მობილიზაციის კამპანია დააანონსა და განაცხადა, რომ 26 მაისს თბილისში მასშტაბური აქცია გაიმართებოდა.
