„საქართველოს ჟურნალისტური ეთიკის ქარტია“ შინაგან საქმეთა სამინისტროს მოუწოდებს, დაუყოვნებლივ გამოიძიოს ხელვაჩაურში ჟურნალისტებისთვის პროფესიული საქმიანობის განხორციელებაში ხელშეშლის ფაქტი.
ქარტიის მიერ გავრცელებულ განცხადებაში აღნიშნულია, რომ ხელვაჩაურის მერიის მიმდებარე ტერიტორიაზე, „აჭარა თაიმსის“ დამფუძნებელს სულხან მესხიძესა და „ბათუმელების“ ჟურნალისტ ლელა დუმბაძეს, რომელიც ამავდროულად ჟურნალისტური ეთიკის საბჭოს წევრია, სავარაუდოდ საჯარო მოხელეებმა პროფესიული მოვალეობის შესრულებაში ხელი შეუშალეს.
განცხადების მიხედვით, ჟურნალისტების მიმართ ადგილი ჰქონდა სიტყვიერ შეურაცხყოფას, მუქარასა და ფიზიკური ანგარიშსწორების მცდელობას. ისინი ამ დროს პატიმრების მშობლების შეხვედრას აშუქებდნენ.
ქარტიის ინფორმაციით, ადგილზე მყოფი რამდენიმე პირი ჟურნალისტების კითხვებს აგრესიითა და მუქარით პასუხობდა. აგრესიულ პირებს შორის იყო ხელვაჩაურის მერიის სანდასუფთავებისა და კომუნალური სამსახურის დირექტორის მოადგილე ჯუმბერ (გენადი) დიასამიძე, რომელიც ხელვაჩაურის მერის, ზაზა დიასამიძე ბიძაშვილია.
საქართველოს ჟურნალისტური ეთიკის ქარტია აცხადებს, რომ მსგავსი შემთხვევები უკვე ტენდენციის სახეს ატარებს. ორგანიზაციის შეფასებით, ჟურნალისტების მიმართ სიძულვილის ენა, რომელიც „ქართული ოცნების“ წარმომადგენლების მხრიდან ისმის, ასევე მედიის წინააღმდეგ ჩადენილი გამოუძიებელი დანაშაულები, დაუსჯელობის განცდას აჩენს და ძალადობას ახალისებს.
განცხადებაში ასევე აღნიშნულია, რომ „მედიის, ინფორმაციისა და სოციალური კვლევების ცენტრმა“ ბოლო ერთი წლის განმავლობაში მედიის წარმომადგენლების წინააღმდეგ 170-მდე შემთხვევა დააფიქსირეს. ქარტია ჟურნალისტების მიმართ ძალადობას მკაცრად გმობს და სოლიდარობას უცხადებს მედიის ყველა წარმომადგენელს, ვინც პროფესიული საქმიანობის შესრულების დროს აგრესიის სამიზნე გახდა.
