„საერთაშორისო გამჭვირვალობა – საქართველოს“ მიერ გამოქვეყნებული ანალიზის მიხედვით, 2024-2025 წლებში სარეკლამო ბაზრის მკვეთრად არათანაბარმა განაწილებამ რეგიონული მედია უკიდურესად მძიმე მდგომარეობაში ჩააყენა.
ორგანიზაციის შეფასებით, არსებული ტენდენცია არა მხოლოდ კრიტიკულ, არამედ განსაკუთრებით რეგიონულ მაუწყებლებს აზარალებს, რომლებიც შეზღუდული ფინანსური რესურსების პირობებში ოპერირებენ.
TI საქართველოს მონაცემებით, 2024-2025 წლებში პროსამთავრობო მაუწყებლებმა ჯამში 89.5 მილიონი ლარის კომერციული სარეკლამო შემოსავალი მიიღეს, მაშინ როცა კრიტიკულ ტელევიზიებზე ეს მაჩვენებელი თითქმის ოთხჯერ ნაკლები – 23 მილიონი ლარი იყო. ორგანიზაცია ხაზგასმით აღნიშნავს, რომ სარეკლამო ბაზრის ეს დისპროპორცია რეგიონულ მაუწყებლებზე კიდევ უფრო მძიმედ აისახა.
კომუნიკაციების კომისიის ოფიციალურ მონაცემებზე დაყრდნობით, TI საქართველო მიუთითებს, რომ ფინანსური რესურსების სიმწირის გამო, 2025 წლიდან მაუწყებლობა ვეღარ განაახლა 17-მა რეგიონულმა მაუწყებელმა. ანგარიშის მიხედვით, რეგიონული ტელევიზიებისა და რადიოების როგორც ჯამური, ისე სარეკლამო შემოსავლები მკვეთრად ჩამორჩება ეროვნული დაფარვის მაუწყებლებს, რაც მათ სტაბილურ ფუნქციონირებას პრაქტიკულად შეუძლებელს ხდის.
ორგანიზაციის შეფასებით, მიუხედავად იმისა, რომ 2025 წლის პირველ სამ კვარტალში სარეკლამო ბაზარზე საერთო ზრდა დაფიქსირდა, ეს ზრდა თითქმის სრულად პროსამთავრობო მაუწყებლების სასარგებლოდ გადანაწილდა, ხოლო რეგიონულ მედიას ფაქტობრივად არ შეხებია. შედეგად, რეგიონებში შემცირდა დამოუკიდებელი საინფორმაციო წყაროების რაოდენობა და გაძლიერდა ცენტრალიზებული საინფორმაციო დღის წესრიგის გავლენა.
„საერთაშორისო გამჭვირვალობა – საქართველო“ განსაკუთრებულ საფრთხედ აფასებს რეგიონული მედიის გაქრობას, რადგან სწორედ ეს მაუწყებლები უზრუნველყოფდნენ ადგილობრივი პრობლემების, მოქალაქეთა ინტერესებისა და თვითმმართველობების საქმიანობის გაშუქებას. მათი დახურვა, ორგანიზაციის შეფასებით, პირდაპირ აისახება რეგიონებში საზოგადოების ინფორმირების ხარისხსა და დემოკრატიულ პროცესებზე.
ანგარიშში ასევე აღნიშნულია, რომ რეგიონულ მედიაში ფინანსურ კრიზისს თან ახლავს ჟურნალისტების შემცირება, ტექნიკური რესურსების დეფიციტი და მრავალთვიანი სახელფასო დავალიანებები. ამ ფონზე, ჟურნალისტების ნაწილი იძულებულია დატოვოს პროფესია, რაც კიდევ უფრო ასუსტებს ადგილობრივ მედიაგარემოს.
TI საქართველო მიიჩნევს, რომ სარეკლამო ბაზრის არსებული სტრუქტურა, კანონმდებლობის გამკაცრება და საერთაშორისო დაფინანსების შეზღუდვა რეგიონულ მედიას სისტემურ ზეწოლას უქმნის. ორგანიზაციის შეფასებით, თუ ეს ტენდენცია არ შეიცვალა, რეგიონული მედიის სრულად გაქრობის საფრთხე რეალურია, რაც საზოგადოებას მრავალფეროვანი და დამოუკიდებელი ინფორმაციის მიღების შესაძლებლობას მნიშვნელოვნად შეუზღუდავს.
