საქართველოში 31 დეკემბრის დღის მეორე ნახევრიდან 3 იანვრამდე არამდგრადი ამინდი შენარჩუნდება. გარემოს ეროვნული სააგენტოს ინფორმაციით, მოსალოდნელია დროგამოშვებითი ნალექი, ზოგან ძლიერი, უმეტესად თოვლის სახით.
მეტეოროლოგები ვარაუდობენ ქარის გაძლიერებას. მთიან რაიონებში მოსალოდნელია ნისლი და ქარბუქი, გზებზე ლიპყინული და ზვავსაშიშროება. 1-2 იანვარს ზღვაზე შესაძლებელია 3-4 ბალიანი შტორმული ღელვა.
უამინდობის გამო, დიდთოვლობის, ქარბუქის, ხილვადობის გაუარესებისა და ლიპყინულის ფონზე, საავტომობილო გზების ცალკეულ მონაკვეთებზე შესაძლებელია ტრანსპორტის მოძრაობის შეზღუდვა.
გარემოს ეროვნული სააგენტო ასევე აფრთხილებს მოსახლეობას, რომ მოსალოდნელმა ინტენსიურმა ნალექებმა შესაძლოა მდინარეებზე წყლის დონეების მატება გამოიწვიოს, ხოლო გორაკ-ბორცვიან და მთიან ზონებში მეწყრულ-ღვარცოფული პროცესების ჩასახვა და გააქტიურება (საფრთხის დონე – საშუალო).
