The Ajara Times-მა ქობულეთის მერიიდან მივლინებების შესახებ ინფორმაცია გამოითხოვა. ამ სტატიაში ვაპირებდით იმის მოყოლას თუ რაში დახარჯა 2023 წლის ბიუჯეტი მუნიციპალიტეტმა, თუმცა მერიამ მოწოდებულ დოკუმენტში მხოლოდ ვიზიტები ასახა, ფინანსები კი არა.
2023 წლის თებერვალში მუნიციპალიტეტის მერი თბილისში, რეგიონული და მუნიციპალური სტატისტიკის პორტალის პრეზენტაციას დაესწრო, რის შემდეგაც თბილისში, ერთ-ერთ ძვირადღირებულ სასტუმროში გაატარა ღამე – რამდენი დაუჯდა მუნიციპალიტეტს ლევან ზოიძის მივლინება? საჯარო ინფორმაციის მოთხოვნის მიუხედავად, ხარჯთაღრიცხვა არ მოგვაწოდეს.
მოწოდებული საჯარო ინფორმაციით, ასევე, ირკვევა რომ ლევან ზოიძე 9 ოქტომბერს, თბილისში გამართულ ტრენინგს დაესწრო.
მერის პირველი მოადგილე, 21-დან 26 თებერვლის ჩათვლით მივლინებით, ქალაქ ვალგაში, ესტონეთის რესპუბლიკის დამოუკიდებლობის 105-ე წლის აღნიშვნას დაესწრო. დავით ვერულიძის ვიზიტი ცხადია ბიუჯეტიდან დაფინანსდა, თუმცა ამ შემთხვევაშიც მუნიციპალიტეტმა კალკულაციის შესახებ ინფორმაცია არ მოგვაწოდა.
ლიეტუვაში, ქალაქ პალანგას მერის ინაუგურაციის ღონისძიებასა და ფესტივალზე დასასწრებად, ქობულეთის მერიის ინფრასტრუქტურის სამსახურის უფროსი, დავით ბოლქვაძე და მერის მოადგილე, მინდია რომანაძე იმყოფებოდნენ. მათი მივლინება ხალხის ფულით დაფინანსდა.
ადმინისტრაციის უფროსი 7 აპრილს, თბილისში, მომსახურების სააგენტოში იმყოფებოდა. გელა გოგიტიძის მივლინება მანქანის სანომრე ნიშნის რეგისტრაციასა და აღებას უკავშირდებოდა. დოკუმენტში მკაფიოდ არაა განმარტებული საჯარო მოხელის ერთ დღიანი ვიზიტი დაფინანსდა თუ არა ბიუჯეტიდან.
სამი დღით იმყოფებოდა თბილისში მერიის არქიტექტურისა და სივრცითი მოწყობის სამსახურის უფროსის მოვალეობის შემსრულებელი. ნათია ბასიაშვილის მივლინება, როგორც უწყება საჯარო წერილში განმარტავს საერთაშორისო კონფერენციაში მონაწილეობას უკავშირდება. ბასიაშვილი მიმდინარე წელს, ასევე, ტრენინგს დაესწრო ქუთაისშიც. საჯარო მოხელის მივლინებები ბიუჯეტიდან დაფინანსდა, ამ შემთვევაშიც უცნობია ხარჯთაღრიცხვა.
წყალტუბოში გამართულ ტრენინგს ქობულეთის მერიის ხუთი თანამშრომელი დაესწრო. ვახტანგ კაკალაძე – ინფრასტრუქტურის სამსახურის ინსპექტირების განყოფილების უფროსი, გენადი თამაზაიშვილი, მერის წარმომადგენელი ბობოყვათში, ია ბერაძე, საქმისწარმოების განყოფილების სპეციალისტი, მალხაზ კვესიეშვილი, მერის წარმომადგენელი ქაქუთში და ნუკრი ჯინჭარაძე მერის წარმომადგენელი კვირიკეში. ამ ხუთი საჯარო მოხელის მივლინებისთვის რამდენი დაიხარჯა ჩვენთვის უცნობია, უწყებამ ინფორმაცია არ მოგვაწოდა.
