ქუთაისის სააპელაციო სასამართლომ ბათილად ცნო აჭარის საზოგადოებრივი მაუწყებლის ყოფილი დირექტორის, გიორგი კოხრეიძის ბრძანებები – თეონა ბაკურიძის ეთერიდან მოხსნისა და გათავისუფლების შესახებ, ამის შესახებ სოციალურ ქსელში ტელეწამყვანი წერს.
თეონა ბაკურიძე აღნიშნავს, რომ სისტემამ, რასაც ის სხვებთან ერთად უპირისპირდებოდა, მაშინაც იცოდა რომ უკანონო იყო მისი გათავისუფლება, მაგრამ ტელეკომპანიას სჭირდებოდა “დრო რომელიც მოიგეს” – 4 წელი.
“სჭირდებოდათ ჩვენი ჩამოცილება სარედაქციო პოლიტიკიდან. ჩვენ ვიცოდით რომ ოცნების ხელისუფლების მთავარი მიზანი იყო აჭარის ტელევიზიის სარედაქციო პოლიტიკის ცვლილება. შეგიძლიათ ერთ გამოშვებას შეხედოთ და ამაში თქვენც დარწმუნდებით,” – აცხადებს თეონა ბაკურიძე.
ინფორმაციისთვის: სასამართლომ არ დააკმაყოფილა დისკრიმინაციის ნაწილი – რაზეც დავას თეონა ბაკურიძე აგრძელებს. მაუწყებელს დაეკისრა კომპენსაცია (6 თვის ხელფასის სახით).
ცნობისთვის: აჭარის მაუწყებლიდან კრიტიკულად განწყობილი არაერთი რეპორტიორი სხვადასხვა მიზეზით გაუშვეს, ნაწილს კი პოზიცია შეუცვალეს და ისინი ეკრანზე იშვიათად ჩნდებიან.
