სახმელეთო ტრანსპორტის სააგენტო საქალაქთაშორისო მგზავრთა გადაყვანის სფეროში რეგულაციების ცვლილების შესახებ ინფორმაციას ავრცელებს. უწყების ცნობით, სააგენტოს ინიციატივით ცვლილებები შედის საქართველოს მთავრობის №4, №400, №442, №426 და №407 დადგენილებებში.
როგორც სააგენტოში განმარტავენ, ცვლილებების მიზანია მგზავრთა უსაფრთხოების ხელშეწყობა, ავტოსატრანსპორტო შემთხვევების შემცირება, საგზაო უსაფრთხოების განვითარება და საავტომობილო ტრანსპორტის სფეროში კონკურენტული გარემოს შექმნა.
ახალი რეგულაციით იცვლება მოთხოვნა, რომლის მიხედვითაც რეგულარულ სამგზავრო გადაყვანაში მხოლოდ M3 კატეგორიის სატრანსპორტო საშუალებები უნდა გამოიყენებოდეს. ამასთან, ქვეყნის შიდა რეგულარული სამგზავრო გადაყვანისას სავალდებულო ხდება სატრანსპორტო საშუალებების აღჭურვა ტაქოგრაფითა და სიჩქარის შემზღუდველი მოწყობილობით.
აღნიშნული მოთხოვნა ვრცელდება M1 (მინივენი), M2 და M3 კატეგორიის ავტოსატრანსპორტო საშუალებებზე. სააგენტოს განმარტებით, ეს მოწყობილობები უზრუნველყოფს მძღოლების სამუშაო და დასვენების რეჟიმების, ასევე გადაადგილების სიჩქარის ეფექტიან კონტროლს.
ახალი ვალდებულებების ამოქმედებისთვის განსაზღვრულია ეტაპობრივი ვადები:
ტაქოგრაფის სავალდებულო გამოყენება:
-
თბილისი – ბათუმის მიმართულებით: 2027 წლის 1 ივნისიდან;
-
სხვა ყველა 50 კილომეტრზე მეტი მანძილით დაშორებული დასახლებისთვის: 2027 წლის 1 დეკემბრიდან.
სიჩქარის შემზღუდველი მოწყობილობა:
-
თბილისი – ბათუმის მიმართულებით: 2027 წლის 1 მარტიდან;
-
სხვა ყველა დასახლებისთვის: 2027 წლის 1 დეკემბრიდან.
სახმელეთო ტრანსპორტის სააგენტოს განცხადებით, ცვლილებები ქმნის დაბალანსებულ და საერთაშორისო პრაქტიკასთან შესაბამის საკანონმდებლო ჩარჩოს, რომელიც ერთდროულად უზრუნველყოფს მგზავრთა უსაფრთხოების გაუმჯობესებასა და საავტომობილო ტრანსპორტის სექტორის მდგრად განვითარებას.
