საქართველოში, საჯარო უწყებების გამჭვირვალობის ხარისხი დაბალია, მათ შორის აჭარაში – ამის შესახებ „მედიის, ინფორმაციის და სოციალური კვლევების ცენტრის” კვლევაშია ნათქვამი. ანალიზმა აჩვენა ისიც, რომ ჟურნალისტებს მუშაობა რთულ პირობებში უწევთ.
ორგანიზაციის დირექტორი “აჭარა თაიმსთან” მთავარ მიგნენებზე საუბრობს და აცხადებს, რომ კვლევა მედიასაშუალებებთან თანამშრომლობის საფუძველზე მომზადდა. ეკა ბასილაიას თქმით, საჯარო დაწესებულებები ინფორმაციას მეტწილად არ გასცემენ, მათ შორის არც მიზეზსს განმარტავენ.
“კვლევამ აჩვენა რამდენად დაბალია საჯარო უწყებების გამჭვირვალობის ხარისხი. კვლევის ძირითადი ნაწილი მედიის მიერ გამოთხოვილ საჯარო ინფორმაციაზე დაყრდნობით მომზადდა. მოკვლეული ინფორმაციის საფუძველზე შეგვიძლია ვთქვათ, რომ ყველა რეგიონში არის პრობლემა. მაგალითად, ამ წელში, აჭარაში, 140 წერილი არის შესული, საიდანაც პასუხი გაცემულია 82 წერილზე, მათ შორის სრულყოფილი არის 47-ზე. ეს არის სისტემური პრობლემა,” – აცხადებს ეკა ბასილაია.
„მედიის, ინფორმაციის და სოციალური კვლევების ცენტრის” დირექტორი იმასაც ამბობს, რომ სახარბიელო მდგომარეობა არცერთ მუნიციპალიტეტშია. შექმნილ ვითარებას ეკა ბასიალია პოლიტიკური ნების არქონას უკავშირებს.
“არსად არ გვაქვს კარგი მდგომარეობა. უპირველეს ყოვლისა ეს არის პოლიტიკის ნაწილი, თუ როგორი პოლიტიკა აქვს საჯარო უწყებებს. კვალიფიკაციის ნაკლებობა რომ იყოს და დათქმულ დროში ვერ გასცემენ ინფორმაციას მაშინ ამის შესახებ განმარტება გაკეთდებოდა. ეს ყველაფერი მიუთითებს იმაზე რომ უბრალოდ გულგრილი დამოკიდებულება აქვთ მედიების მიმართ, ანგარიშვალდებულების განცდა დაბალია,” – ამბობს ბასილაია.
ორგანიზაციაში მიაჩნიათ, რომ სიტუაცია კიდევ უფრო, რუსული კანონის ამოქმედების შემდეგ გართულდება. კერძოდ, საჯაროდ გაცხადებული პოზიციების თანახმად, მესამე სექტორი და მედია აგენტად რეგისტრაციას არ აპირებს, შესაბამისად ხელსიუფლების მიზანიც ესაა – ნაკლებად მიუწვდებოდეს ვინმეს საჯარო ინფორმაციაზე ხელი.
“რუსული კანონის ამოქმედების შემთხვევაში რა თქმა უნდა ძალიან ბევრი პრობლემა წარმოიშვება. აგენტად რეგისტრაციას არავინ აპირებს, რაც მათ გაუქმებას გამოიწვევს. რეალურად ქვეყანაში საჯარო ინფორმაციის გამომთხოვი არავინ დარჩება. იმედი ვიქონიოთ რომ სცენარი ამგვარად არ განვითარდება,” – აცხადებს “მედიის ინფორმაციის და სოციალური კვლევების ცენტრის” დირექტორი.
