ბათუმის შოთა რუსთაველის სახელმწიფო უნივერსიტეტის ასოცირებული პროფესორის, ნანი გვარიშვილი მხრიდან შესაძლო ძალადობის ფაქტზე შინაგან საქმეთა სამინისტრომ გამოძიება დაიწყო.
როგორც შსს-ში განმარტავენ, გამოძიება საქართველოს სისხლის სამართლის კოდექსის 126-ე მუხლით, რაც ძალადობას გულისხმობს, მიმდინარეობს.
ინციდენტი 29 მაისს, ბათუმის შოთა რუსთაველის სახელმწიფო უნივერსიტეტის მიმდებარე ტერიტორიაზე მოხდა. სამოქალაქო აქტივისტების განცხადებით, ასოცირებულმა პროფესორმა ნანი გვარიშვილმა მათ სიტყვიერი შეურაცხყოფა მიაყენა და ერთ-ერთი აქტივისტის მობილური ტელეფონის დაზიანებაც სცადა.
აქტივისტები ადგილზე დიუშენის სინდრომის მქონე ბავშვების მხარდასაჭერად ხელმოწერებს აგროვებდნენ. მედიკამენტების დაფინანსებისა და მიწოდების მოთხოვნით პეტიცია უკვე მომზადებულია, ხელმოწერები კი საქართველოს სხვადასხვა ქალაქში გრძელდება.
მათი თქმით, დაპირისპირების დროს მათ სიტყვიერი შეურაცხყოფა მიაყენა ნანი გვარიშვილის მეუღლემ, ანზორ დევაძემაც, რომელიც ასევე უნივერსიტეტის პროფესორია.
მოგვიანებით, აქტივისტების განცხადებით, მათ მიმართ ბრალდებებსა და სიტყვიერ შეურაცხყოფაში ჩაერთო ნანი გვარიშვილისა და ანზორ დევაძის შვილი, ლელა დევაძე, რომელიც ასევე ბსუ-ში ასისტენტ-პროფესორის პოზიციაზე მუშაობს.
მომხდართან დაკავშირებით კომენტარი გააკეთეს ბათუმის შოთა რუსთაველის სახელმწიფო უნივერსიტეტშიც.
„ველოდებით სამართალდამცავების გადაწყვეტილებას და უახლოეს დღეებში ეთიკის კომისიას მოვიწვევთ,“ – აცხადებენ უნივერსიტეტში.
დაპირისპირების ამსახველი ვიდეო ნახეთ ბმულზე🔻
