სახელმწიფო უსაფრთხოების სამსახურის ყოფილი უფროსი გრიგოლ ლილუაშვილი დააკავეს. „ქართული ოცნების“ პროკურატურა მას განსაკუთრებით დიდი ოდენობით ქრთამის აღებას ედავება. ბრალის დამტკიცების შემთხვევაში, ლილუაშვილს 11-დან 15 წლამდე თავისუფლების აღკვეთა ემუქრება.
პროკურორის, გიორგი გვარაკიძის განცხადებით, გამოძიება რამდენიმე მძიმე ეპიზოდს მოიცავს. მისი თქმით, 2022 წლის ოქტომბერში გრიგოლ ლილუაშვილმა თურქი ინვესტორისგან, ჩაღათაი ულქერისგან, ეკონომიკის მინისტრის იმჟამინდელი პირველი მოადგილის, რომეო მიქაუტაძის მეშვეობით, ქრთამის სახით ერთი მილიონი აშშ დოლარი მიიღო. პროკურატურის ვერსიით, აღნიშნული თანხა ლილუაშვილმა ქარის ელექტროსადგურების მშენებლობასთან დაკავშირებული ურთიერთთანამშრომლობის მემორანდუმის გაფორმებაში ლობირების სანაცვლოდ აიღო.
მეორე ეპიზოდი 2022 წლის თებერვალს უკავშირდება. გამოძიების ინფორმაციით, ამ შემთხვევაშიც რომეო მიქაუტაძის შუამავლობით, კომპანია „ექსპრესი სერვისი 2008“-ის დამფუძნებელ გიორგი ხაჟალიასგან, გაზიფიკაციის ტენდერებში დახმარების სანაცვლოდ, გრიგოლ ლილუაშვილმა მილიონნახევარი ლარი მიიღო.
მესამე ეპიზოდი 2021–2023 წლებს მოიცავს და ე.წ. თაღლითურ ქოლ-ცენტრებს უკავშირდება. პროკურატურის ცნობით, მიუხედავად სახელმწიფოს მიერ დეკლარირებული ბრძოლისა, ქვეყანაში ფუნქციონირებდა რამდენიმე ათეული მსგავსი ქოლ-ცენტრი. მოწმეთა ჩვენებების მიხედვით, მათი დიდი ნაწილი ეკუთვნოდა პირთა ჯგუფს, რომლებიც მიღებული შემოსავლებიდან სხვადასხვა ოპოზიციურ მედიას აფინანსებდნენ, ხოლო ქოლ-ცენტრების შედარებით მცირე ნაწილის მფარველი გრიგოლ ლილუაშვილი იყო. გამოძიების ვერსიით, ლილუაშვილი აღნიშნულ საქმიანობას მისი ნათესავის, სანდრო ლილუაშვილის მეშვეობით ახორციელებდა და ქრთამის სახით, შუამავლობით, დაახლოებით 1 მილიონ 365 ათასი აშშ დოლარი მიიღო.
მეოთხე ეპიზოდის მიხედვით, გრიგოლ ლილუაშვილი თანამდებობრივი მდგომარეობის გამოყენებით, ქრთამის აღების სანაცვლოდ, მფარველობას უწევდა მის მეგობარს – თბილისის მერიის საბავშვო ბაგა-ბაღების მართვის სააგენტოს ყოფილ დირექტორს, კახა გვანცელაძეს. პროკურატურის განცხადებით, გვანცელაძე საბავშვო ბაღების მიერ განსახორციელებელი შესყიდვების ხელშეკრულებების გაფორმებისას მეწარმე სუბიექტებისგან განსაკუთრებით დიდი ოდენობის თანხებს, ე.წ. „ატკატებს“, იღებდა. ამ სქემაში ჩართული იყვნენ სააგენტოს ფინანსური აღრიცხვის, გაანგარიშებისა და მონიტორინგის თანამშრომლებიც, რომელთა მიმართაც სისხლისსამართლებრივი დევნა დაწყებულია.
პროკურატურის ცნობით, გრიგოლ ლილუაშვილს ბრალი ედება საქართველოს სისხლის სამართლის კოდექსის 338-ე მუხლის მე-2 ნაწილის „გ“ ქვეპუნქტით და მე-3 ნაწილის „ე“ ქვეპუნქტით, რაც წინასწარი შეთანხმებით ჯგუფის მიერ, განსაკუთრებით დიდი ოდენობით ქრთამის აღებას გულისხმობს.
უწყების განცხადებით, პროკურატურა სასამართლოს ლილუაშვილისთვის აღკვეთის ღონისძიების სახით პატიმრობის შეფარდებას მოსთხოვს. გიორგი გვარაკიძის თქმით, გამოძიება გრძელდება ლილუაშვილის მიერ ჩადენილი სხვა შესაძლო დანაშაულების გამოვლენისა და მასთან ერთად სავარაუდო დანაშაულებში მონაწილე პირების დადგენა-დაკავების მიზნით.
