„აჭარა თაიმსის“ ინფორმაციით, ქობულეთის სამედიცინო ცენტრის ემერჯენსის განყოფილებაში მედპერსონალს ფიზიკურად გაუსწორდნენ და სამედიცინო ინვენტარი დააზიანეს.
ჩვენი ინფორმაციით, ინციდენტში მონაწილე ორი კაცი დააკავეს. დაკავებულები ქობულეთისა და ქარელის მუნიციპალიტეტებში ცხოვრობენ. ისინი წინასწარი დაკავების იზოლატორში გადაიყვანეს.
კლინიკის დირექტორის, ლაშა რომანაძის განცხადებით, კაცები სამედიცინო დაწესებულებაში პირველადი დახმარების მისაღებად შევიდნენ. მისი თქმით, ისინი ალკოჰოლის ზემოქმედების ქვეშ იმყოფებოდნენ და კლინიკის ერთ-ერთი მედპერსონალის მიერ გაწეულ დახმარებაზე უარი განაცხადეს, რის შემდეგაც ფიზიკურ ძალადობაზე გადავიდნენ.
დაპირისპირების შედეგად დაზიანებები მიიღეს კლინიკის თანამშრომლებმა. კლინიკის დირექტორის ინფორმაციით, მედპერსონალი გამოიკითხა და თანამშრომლები ექსპერტიზაზეც გადაიყვანეს. ექსპერტიზამ მედპერსონალსა და განყოფილების ხელმძღვანელს მრავლობითი დაზიანებები დაუდგინა.
შსს-მ გამოძიება სისხლის სამართლის კოდექსის 126-ე მუხლით დაიწყო, რაც ჯგუფურად ჩადენილ ძალადობას გულისხმობს. პოლიციამ ორი პირი ადგილზე დააკავა.
