მესამე წელია ამირან მესხიძეს სახლის მეორე სართულზე ასვლა ხის კიბით უწევს. მოქალაქეს ქვის კაპიტალური კიბე მუნიციპალიტეტის მერიამ ახლის გაკეთების მოტივით დაუნგრია, თუმცა დემონტაჟის შემდეგ სოფელში არავინ გამოჩენილა.
საქმე ისაა, რომ მერიის მიერ გამოცხადებულ ტენდერში გამარჯვებულ კომპანიას სახლის მიმდებარედ ფერდსამაგრი სამუშაოები უნდა განეხორციელებინა, პროცესის წარმოებას კი, როგორც ამირან მესხიძეს მერიის წარმომადგენლებმა განუცხადეს კიბე აფერხებდა. მერიის იმდროეინდელი ინფრასტრუქტურის სამსახურის უფროსი, ზაზა კაიკაციშვილი მოქალაქეს დაჰპირდა, რომ ქვის კიბის დემონტაჟის შემდეგ ახალს გაუკეთებდნენ, თუმცა სიტყვიერი პირობა ცრუ აღმოჩნდა.
სახელმწიფოსგან დაზარალებულ მოქალაქეს ახლა ყველა ემალება და მას არავინ ხვდება. მუნიციპალიტეტის მერია ამირან მესხიძის წერილობით მიმართვებსაც უპასუხოდ ტოვებს.
ქობულეთის მერიაში ირწმუნებიან, რომ მოქალაქეს ახალი კიბის მოწყობა დღემდე არ მოუთხოვია. უწყებაში იმასაც ამტკიცებენ, რომ კიბის დემონტაჟი მესხიძის მოთხოვნის საფუძველზე მოხდა. მერიამ მათი პოზიციის სარწმუნო დოკუმენტები ვერ მოგვაწოდა, შესაბამისად ირკვევა, რომ უწყებამ მოქალაქეს კიბე წერილობითი თანხმობის გარეშე დაუნგრია.
“ფერდსამაგრი კედლის მოწყობის დროს, მოხდა არსებული კიბის დემონტაჟი. კიბე იყო დაზიანებული და მისი დემონტაჟი მოქალაქემ თავად მოითხოვა. რაც შეეხება ახალი კიბის მშენებლობას, მერიის წარმომადგენლების მიერ მოხდა განმარტება, რომ აღნიშნული სამუშაოების ფარგლებში ვერ განხორციელდებოდა ახალი კიბის მოწყობა. საჭირო იყო დამატებით მოთხოვნის გაკეთება ინჟინერ-კონსტრუქტრის მოწვევასთან დაკავშირებით. მოქალაქე ამირან მესხიძეს უნდა დაეწერა შესაბამისი განცხადება, რის შემდეგადაც მერიის მიერ მოხდებოდა შესაბამისი ღონისძიების გატარება. ამირან მესხიძეს მერიისთვის ამ დრომდე კიბის მოწყობის სამუშაოებთან დაკავშირებით მომართული არ აქვს,” – მოგვწერეს ქობულეთის მერიიდან.
