„ბათუმის ნავთობტერმინალი“ აცხადებს, რომ ტერმინალი ჩვეულებრივ რეჟიმში ფუნქციონირებს. კომპანიაში აღნიშნავენ, რომ ყველა თანამშრომელი სამუშაო ადგილზე იმყოფება და საქმიანობას საქართველოს კანონმდებლობის სრული დაცვით ახორციელებს.
„ტერმინალისა და მისი მუშაკების სამართლებრივი ინტერესები და უფლებები სრულიად დაცულია. გამოძიების საიდუმლოების დაცვის მიზნით თავს ვიკავებთ დამატებითი კომენტარებისგან,“ – ნათქვამია კომპანიას მიერ 5 დეკემბერს გავრცელებულ განცხადებაში.
ამასთან, ფინანსთა სამინისტროს საგამოძიებო სამსახური ავრცელებს ინფორმაციას, რომლის მიხედვითაც, ორგანიზებული ჯგუფის მიერ საბაჟო წესების დარღვევის საქმეზე 3 დეკემბერს ყაზახეთის სამი მოქალაქე დააკავეს.
გამოძიებამ დაადგინა, რომ შპს „ბათუმის ნავთობტერმინალის“ ხელმძღვანელ პირებს ტერმინალის რეზერვუარებში არსებული 10 000 ტონაზე მეტი განუბაჟებელი ნედლი ნავთობის – საერთო ღირებულებით 15 მილიონ ლარზე მეტი – საბაჟო პროცედურების გვერდის ავლით და მალულად განკარგვა ედება ბრალად.
სამსახურის ინფორმაციით, ბრალდებულებმა მაღალი ხარისხის ნავთობის განკარგვის შესანიღბად რეზერვუარებში დაბინძურებული და გამოუსადეგარი ნარჩენები განათავსეს.
„მიმდინარეობს ინტენსიური საგამოძიებო მოქმედებები დანაშაულებრივი სქემის სხვა მონაწილეების იდენტიფიცირების, ბიუჯეტისთვის მიყენებული ზიანის მოცულობის დადგენისა და კონტრაბანდული ნავთობის შემდგომი განკარგვის დადგენის მიზნით,“ – წერია უწყების მიერ გავრცელებულ ინფორმაციაში.
გამოძიება საქართველოს სისხლის სამართლის კოდექსის 214-ე მუხლის მე-2 და მე-6 ნაწილებით მიმდინარეობს, რაც 11-დან 15 წლამდე თავისუფლების აღკვეთას ითვალისწინებს.
