ფოტოზე ჩანს ტროტუარზე ფილების აყრის პროცესი, საიდანაც შუახევის მერის ოჯახის კუთვნილ მიწამდე გზა უნდა მივიდეს
დღეს, 19 ივნისს, დილით, ბათუმში, გაგარინის ქუჩაზე მძიმე ტექნიკა გამოჩნდა. ადგილობრივ მოსახლეობას ადგილზე აცნობეს, რომ იგეგმება გენერალ აბაშიძის ქუჩის ერთ-ერთ ჩიხთან დამაკავშირებელი გზის გაყვანა გაგარინის ქუჩის მხრიდან.
ტერიტორია, სადაც ბათუმის მერიის კეთილმოწყობის სამსახურმა სამუშაოების დაწყება გადაწყვიტა, ერთ-ერთი ადგილობრივის განცხადებით, საარქივო დოკუმენტაციის მიხედვით მის ოჯახს ეკუთვნის, თუმცა ტარიელ დიასამიძის თქმით, აღნიშნული ფართობი საჯარო რეესტრში დღემდე ვერ დაირეგისტრირა.
ადგილობრივი მცხოვრები ტარიელ დიასამიძე „აჭარა თაიმსთან“ საუბარისას აცხადებს, რომ ბათუმის მუნიციპალიტეტი მის მამაპაპისეულ ტერიტორიაზე სამუშაოებს ატარებს ისე, რომ საკუთრების უფლების დაცვას ვერ ახერხებს. მისი თქმით, სწორედ ამიტომ გადაწყვიტა საკითხის საჯაროდ, მედიით გაჟღერება.
როგორც ადგილობრივები ამბობენ, ტერიტორიაზე, სადაც ახლა სამანქანე გზის მოწყობა იგეგმება, მანამდე მხოლოდ სავალფეხო ბილიკი არსებობდა, რომელიც სარეველა ბალახებითაა დაფარული.
„აჭარა თაიმსის“ მიერ მოპოვებული ინფორმაციით, ახალი გზა შუახევის მერის, ომარ ტაკიძის მეუღლის საკუთრებაში არსებულ მიწის ნაკვეთამდე, ჭიშკრამდე უნდა მივიდეს.
ქონებრივი დეკლარაციის მიხედვით, გაგარინის ქუჩის №38 ა და ბ-ში ხათუნა დუმბაძე 580 კვ.მ ფართობის მიწის ნაკვეთს ფლობს. აღნიშნულ ტერიტორიასთან მისასვლელი გზა გენერალ აბაშიძის ქუჩის მხრიდან უკვე არსებობს, თუმცა ადგილობრივების ნაწილი ვარაუდობს, რომ მიმდინარეობს ცენტრალურ გზასთან დამატებითი დამაკავშირებელი გზის მოწყობა.
ბათუმის მერიის კეთილმოწყობის სამსახურში არ განმარტავენ, ვისი მოთხოვნით მიმდინარეობს სამუშაოები. მიუხედავად ჩვენი არაერთი მცდელობისა, ადგილზე მყოფი წარმომადგენლებისგან კომენტარის მიღება ვერ მოხერხდა.
თავდაპირველად ადგილობრივებმა გზის გაყვანის პროცესის შეჩერება სცადეს და ტექნიკის მუშაობა დროებით შეწყდა, თუმცა რამდენიმე საათში სამუშაოები განახლდა. ტარიელ დიასამიძე აცხადებს, რომ მას ემუქრებია. ის ითხოვს, საქმით პროკურატურა დაინტერესდეს.
ნახეთ, პირდაპირი ეთერის ჩანაწერი ადგილიდან ⇓
„აჭარა თაიმსი“ შუახევის მერთან დაკავშირებას ცდილობდა, თუმცა ომარ ტაკიძემ ჩვენს სატელეფონო ზარებსა და შეტყობინებას არ უპასუხა.
დაკავშირებული თემები ⇓
რა ქონებას ფლობენ მუნიციპალიტეტების მერები
შუახევის მერიის თანამშრომელი ქრთამის აღების დახმარების ბრალდებით დააკავეს
შუახევსა და ქედაში სახელმწიფო ტყეში უკანონო კოტეჯები აღმოაჩინეს
„ქართული ოცნების“ აჭარის საკრებულოებსა და მერიებს კაცები უხელმძღვანელებენ
