თბილისის საქალაქო სასამართლომ დააკმაყოფილა საქართველოს ახალგაზრდა იურისტთა ასოციაციის (საია) შუამდგომლობა და შეაჩერა თემურ ქათამაძის გაძევების შესახებ შინაგან საქმეთა სამინისტროს მიგრაციის დეპარტამენტის გადაწყვეტილების მოქმედება. განჩინების საფუძველზე, ქათამაძე ქვეყანაში დარჩება სასამართლოს საბოლოო გადაწყვეტილების მიღებამდე.
შინაგან საქმეთა სამინისტრომ 2025 წლის 30 აპრილს მიიღო თემურ ქათამაძის საქართველოდან გაძევების გადაწყვეტილება. გაძევების პროცედურების საფუძვლად 2025 წლის 29 აპრილს თბილისის სააპელაციო სასამართლოს მიერ მიღებული გადაწყვეტილება სახელდება, რომლის თანახმადაც ქათამაძეს საერთაშორისო დაცვაზე უარი ეთქვა. საია აღნიშნულ უარს უკანონოს და დაუსაბუთებულს უწოდებს.
საიამ თემურ ქათამაძის სახელით გაასაჩივრა გაძევების გადაწყვეტილება და თანადართულად მოითხოვა მისი მოქმედების შეჩერება, ვიდრე საქმის განხილვა არ დასრულდება. სასამართლომ სარჩელი ზეპირი მოსმენის გარეშე მიიღო განსახილველად და 30-დღიან ვადაში გამოიტანს საბოლოო გადაწყვეტილებას.
