შინაგან საქმეთა სამინისტროს ინფორმაციით, ცენტრალური კრიმინალური პოლიციის, საპატრულო და სასაზღვრო პოლიციის თანამშრომლების მიერ, ერთობლივად ჩატარებული მასშტაბური ოპერაციის შედეგად, აღკვეთილია ნარკოდანაშაულის კიდევ ერთი მსხვილი ფაქტი.
უწყება განმარტავს, რომ ბათუმის პორტის ტერიტორიაზე შემოსული სატვირთო ავტომობილი შეამოწმეს, რა დროსაც ამოიღეს განსაკუთრებით დიდი ოდენობით სხვადასხვა სახის ნარკოტიკული საშუალება:
- 1 კილოგრამი და 167 გრამი „კოკაინი“
- 2 000 აბზე მეტი „მდმა“
- დაახლოებით 2 კილოგრამი „მდმას“ კრისტალები
- 2 კილოგრამამდე „კლეფერდრონი“
- 1 კილოგრამი „კეტამინი“
- და „ლსდ“-ს შემცველი მუყაოს ფირფიტები
ოპერაციის შედეგად დაკავებულია უცხო ქვეყნის მოქალაქე, რომლის მიმართ გამოძიება გრძელდება საქართველოს სისხლის სამართლის კოდექსის შესაბამის მუხლით, რაც განსაკუთრებით დიდი ოდენობით ნარკოტიკული საშუალების უკანონო შეძენა-შენახვასა და შემოტანას გულისხმობს.
დანაშაული 20 წლამდე ან უვადო თავისუფლების აღკვეთას ითვალისწინებს.
