ქობულეთის შემოვლთ გზაზე, მდინარე საჩინოს ხიდზე, მიმდინარეობს სადეფორმაციო ნაკერის გადაუდებელი დროებითი შეკეთების სამუშაოები – ინფორმაციას საავტომობილო გზების დეპარტამენტი ავრცელებს.
სამუშაოების გამო, 27 ოქტომბრის 12:00 საათიდან 29 ოქტომბრის 15:00 საათამდე, შეიზღუდება მოძრაობა სარფი-ფოთის მიმართულების (მარცხენა) ზოლზე. ამ პერიოდში ავტოტრანსპორტი იმოძრავებს ჩაქვის სატრანსპორტო კვანძის გავლით, შიდასახელმწიფოებრივი მნიშვნელობის გრიგოლეთი-შეკვეთილი-ქობულეთი-ჩაქვი-მახინჯაურის (გვირაბის შემოსასვლელი) გზის გამოყენებით.
სამუშაოების მეორე ეტაპზე, 29 ოქტომბრის 15:00 საათიდან 31 ოქტომბრის 18:00 საათამდე, მოძრაობა შეიზღუდება ფოთი-სარფის მიმართულების (მარჯვენა) ზოლზე. ამ პერიოდში ტრანსპორტის გადაადგილება განხორციელდება ქობულეთის სატრანსპორტო კვანძის გავლით, საჯავახო-ჩოხატაური-ოზურგეთი-ქობულეთის და გრიგოლეთი-შეკვეთილი-ქობულეთი-ჩაქვი-მახინჯაურის (გვირაბის შემოსასვლელი) გზების გამოყენებით.
საავტომობილო გზების დეპარტამენტი მოუწოდებს მძღოლებს, გადაადგილებისას გაითვალისწინონ დროებითი შეზღუდვები და სათადარიგო მარშრუტები. სამუშაოები დასრულდება 31 ოქტომბრის 18:00 საათზე.
ინფორმაციისთვის: ქობულეთის შემოვლით გზაზე ხიდების გადაბმა, რკინის კონსტრუქცია იყო დაზიანებული, რის გამოც მძღოლები მოსალოდნელ საფრთხეზე საუბრობდნენ. პრობლემის მოგვარება მანამ არ დაიწყო, ვიდრე ამის შესახებ მედია არ ალაპარაკდა.
