ბათუმის თითქმის ყველა მუნიციპალურ ავტობუსში სხვადასხვა სახისა და ზომის წარწერებს შეხვდებით. კედლებისა და სკამების ნაწილი გაფერადებულია. წარწერები იმდენად შესამჩნევია, რომ ხშირ შემთხვევაში ავტობუსის შიდა სივრცე არაესთეტიურად გამოიყურება.
მუნიციპალურ ავტობუსებში განთავსებულია სათვალთვალო კამერები, თუმცა როგორც ჩანს ეს პრობლემას ვერ აგვარებს. შპს “ბათუმის ავტოტრანსპორტის” დირექტორი გვარწმუნებს, რომ ვიდეო მონიტორინგი გამართულად მუშაობს და დარღვევების იდენტიფიცირებას ახდენენ, თუმცა ლევან ლაზარეიშვილმა ჩვენთან საუბრისას ვერ გაიხსენა, მაგალითად, 2023 წელს ასეთი რამდენი ფაქტი დაფიქსირდა.
“იყო რამდენიმე შეთხვევა, რაზეც მოვახდინეთ რეაგირება. იდენტიფიცირების შემდეგ მივმართეთ შესაბამის ორგანოებს და მიმდინარეობს მოკვლევა აღნიშნულთან დაკავშირებით,” – გვითხრა ლევან ლაზარეიშვილმა.
ავტოტრანსპორტის დირექტორის თქმით, კედლებს არასრულწლოვნები ხატავენ, შესაბამისად ლევან ლაზარეიშვილი აქცენტს იმ გარემოებაზე აკეთებს, რომლის მიხედვითაც, მოზარდები კანონდებლობის თანახმად, სანქციას არ ექვემდებარებიან. ლაზარეიშვილმა ჩვენთან საუბრისას ისიც აღნიშნა, რომ შეღებილ კედლებს პერიოდულად რეცხავენ, ასევე, ცნობიერების ამაღლების კუთხით სხვადასხვა სახის აქტივობას ახორციელებენ.
