ხელვაჩაურში მოკლული ბესიკ ბოლქვაძის საქმეზე, მკვლელობის შეუტყობინებლობის ეპიზოდთან დაკავშირებით, სასამართლომ გადაწყვეტილება დღეს გამოაცხადა. მოსამართლე ლევან ყოლბაიამ ბრალდებულ თამაზ შარაძეს 5 წლით თავისუფლების აღკვეთა მიუსაჯა.
პროკურატურის მტკიცებით, შარაძეს მკვლელობის შესახებ ინფორმაცია ჰქონდა, თუმცა მან ამის თაობაზე სამართალდამცავ ორგანოებს არ აცნობა.
» ხელვაჩაურში ახალგაზრდა კაცის მკვლელობის ფაქტზე ორი პირი დააკავეს
სასამართლო პროცესზე თამაზ შარაძემ განაცხადა, რომ დაკავებისას და შემდგომ პერიოდში, ლაითურის პენიტენციურ დაწესებულებაში, ადმინისტრაციის თანამშრომლების მხრიდან არაადამიანური მოპყრობის მსხვერპლი გახდა. მისი თქმით, მასზე ფიზიკური და ფსიქოლოგიური ძალადობა განხორციელდა, ბრალის აღიარების მოთხოვნის მოტივით.
- ვიდეო მასალა არქივიდან ⇓
სასამართლოს გადაწყვეტილებას ბრალდებულ თამაზ შარაძის ოჯახის წევრების პროტესტი მოჰყვა. მათი განცხადებით, ის უდანაშაულოა და მის მიმართ გამოტანილი განაჩენი უსამართლოა. ოჯახის წევრები ასევე, ფაქტების გარეშე, ირწმუნებიან, რომ მკვლელობის მოტივი შესაძლოა სრულიად სხვა გარემოებებს უკავშირდებოდეს და მათი თქმით, ამ მიმართულებით გამოძიება სათანადოდ არ მიმდინარეობს.
მათივე მტკიცებით, გარდაცვლილი შესაძლოა დაკავშირებული ყოფილიყო თურქეთში მოპარულ ოქროსა და ნარკოტიკულ საშუალებებთან, თუმცა აღნიშნულ ბრალდებებს დაზარალებული მხარე კატეგორიულად უარყოფს.
- ვიდეო მასალა არქივიდან ⇓
