ხელვაჩაურის მუნიციპალიტეტში, სოფელ აჭარის აღმართში ნაპოვნი და-ძმის გარდაცვალების სავარაუდო მიზეზად სხეულის გადაციება სახელდება.
გამოძიების პირველადი მონაცემებით, დარია და ტარიელ ფარტენაძეები მოყინვის შედეგად გარდაიცვალნენ.
შსს ინფორმაციით, ცხედრების პირველადი დათვალიერებისას არ გამოვლენილა ისეთი დაზიანებები, რომლებიც ძალადობრივ სიკვდილზე მიანიშნებდა. შსს-ში განმარტავენ, რომ საბოლოო დასკვნის დასადგენად დანიშნულია შესაბამისი სასამართლო-სამედიცინო ექსპერტიზები.
„აჭარა თაიმსის“ ინფორმაციით, და-ძმის ცხედრები საცხოვრებელი სახლიდან მოშორებით, საკარმიდამო ნაკვეთზე დღეს აღმოაჩინეს.
მომხდართან დაკავშირებით გამოძიება საქართველოს სისხლის სამართლის კოდექსის 116-ე მუხლით მიმდინარეობს, რაც სიცოცხლის გაუფრთხილებლობით მოსპობას გულისხმობს.
