მონიკა ჩოგაძე ხულოს მუნიციპალიტეტის სოფელ განახლებაში ცხოვრობს. ფოტოგრაფიით რამდენიმე წლის წინ დაინტერესდა. ოჯახის წევრებს, მეგობრებსა და ნათესავებს ხშირად იღებდა. პროცესი დიდ სიამოვნებას ანიჭებდა, გადაღებულ ფოტოებს ყურადღებით აკვირდებოდა და მუდმივად ცდილობდა, ყოველ ჯერზე უკეთესი გადაეღო. პანდემიის პერიოდი, არაერთი ადამიანის მსგავსად, მისთვისაც ახალი შესაძლებლობების გაჩენისა და გამოყენების ეტაპად იქცა.
,,2022 წელს როცა პანდემია დაიწყო და დავრჩით ყველა სახლში ინტერნეტში გადავაწყდი რეკლამას, რომელიც ონლაინ ფოტოგრაფიის კურსს ეხებოდა. დავინტერესდი, დავრეგისტრირდი და გავიარე. კურსის დასრულების შემდეგ, ჩემს პრაქტიკულ გამოცდილებას უკვე თეორიული ცოდნა დაემატა და ბუნებრივია, გადმოვიტანე ეს ცოდნა ტექნიკაში.
ახალმა ფოტოებმა, რომელსაც ვიღებდი, კიდევ უფრო დიდი მოწონება დაიმსახურა. ადამიანები უკვე მეკითხებოდნენ მქონდა თუ არა სტუდია, სადაც შეძლებდნენ მოსვლას. სტუდიის არარსებობის გამო, ფოტოსესიებს მხოლოდ გარე სივრცეში ვაწყობდი, თუმცა ძალიან აქტიურად ვფიქრობდი უკვე საკუთარ ფოტო-სტუდიაზე, ‘’ – ამბობს მონიკა ჩვენთან საუბრისას.
მისი წარმატების მეორე ეტაპიც სოციალური მედიის საშუალებით მიღებულ ინფორმაციას უკავშირდება. Facebook-ის მეშვეობით გაიგო, რომ ხულოს ქალთა ოთახი, სოფლად მცხოვრები ქალების ეკონომიკური გაძლიერებისთვის ახალ პროექტს იწყებდა. განაცხადი შეავსო და ყველა ეტაპი წარმატებით გაიარა.
,,მოუთმენლად ველოდი შედეგებს, რადგან ეს ფოტოსტუდია ჩემთვის იყო როგორც დიდი ხნის ოცნების ახდენის, ასევე, ჩემი საქმიანობის, რეალურ ბიზნესად ქცევის შესაძლებლობა. მე ამ კონკურსში გავიმარჯვე. დაფინანსების მიღებისთანავე გავაკეთე ჩემი სტუდია, სადაც უკვე არაერთი ფოტოსესია მოვაწყვე და მომდევნო თვეების ჯავშნებიც გაჩნდა,“ – გვიყვება ფოტოგრაფი.
მონიკას მიაჩნია, რომ ეს მხოლოდ დასაწყისია. მისი მიზანია, რომ ფოტოსტუდია კიდევ უფრო განვითარდეს, გაფართოვდე და გახდეს ადგილი, რომელიც შეძლებს სრულად დააკმაყოფილოს ადგილობრივების მოთხოვნა.
,,მე მიმაჩნია, რომ ქალების მხარდამჭერი პროგრამები მაღალმთიან აჭარაში მცხოვრებ ქალებს საკუთარი ნიჭის გამოვლენასა და შემოსავლის წყაროდ ქცევაში დაეხმარება, “ – ამობს მონიკა.
ხულოს ქალთა ოთახი ,,სოფლად მცხოვრები ქალების სოციალურ-ეკონომიკური გაძლიერების“ პროექტს კომპანია ,,აჭარისწყალი ჯორჯიას’’ ფინანსური მხარდაჭერით ახორციელებს.
ინფორმაციისთვის: როგორც კომპანიაში განმარტავენ, 2023 წელს, 10 პროექტი შეირჩა და დაფინანსდა.
