“შეხვედრა ბათუმელ მეგობრებთან,” – ასეთი დასათაურება ჰქონდა ფოტო და ვიდეო მასალებს, რომლებიც თორნიკე რიჟვაძემ ოფიციალურ გვერდზე გამოაქვეყნა. შეხვედრა 29 სექტმებერს გაიმართა, რომელზეც მხოლოდ სახელისუფლებო მედიის წარმომადგენლები მიიწვიეს. ღონისძიების შესახებ წინასწარ ანონსი არ იყო ცნობილი.
ირკვევა, რომ საზაფხულო თეატრში “ქართული ოცნების” ლიდერები საჯარო მოხელეებსა და ამომრჩევლებს წინასაარჩევნო კამპანიის ფარგლებში შეხვდნენ. საზაფხულო თეატრში ამომრჩევლებთან შეხვედრის სურვილი ჰქონდა პარტია “საქართველოსთვის” წარმომადგენლებს, თუმცა მათი მცდელობა უშედეგო აღმოჩნდა.
“თავდაპირველად შეთავაზებას დათანხმდნენ, მაგრამ მოგვიანებით უარი გვითხრეს შეხვედრის გამართვაზე. მიზეზად სხვა ღონისძიება დაგვისახელეს,” – აცხადებენ გიორგი გახარიას პარტიაში.
ინფორმაციისთვის: პარტიას წინასაარჩევნო ღონისძიების გამართვა 20 ოქტომბერს სურდა. ამავე დღეს საზაფხულო თეატრში ღონისძიების გამართვის შესახებ ინფორმაცია ბათუმის მერიის ვებგვერდსა და სოციალურ ქსელებში არ იძებნება.
ბათუმის მერიაში არ პასუხობენ კითხვას თუ რის საფუძველზე დაუთმეს შეხვედრისთვის მმართველ პარტიას საზაფხულო თეატრის შენობა.
ცნობისთვის: საქართველოს საარჩევნო კოდექსის თანახმად, საარჩევნო ხელმისაწვდომობის საშუალება ყველა პარტიისთვის უნდა იყოს თანაბარი და არადისკრიმინაციული. სახელმწიფომ პარტიებს შესაძლებელია შესთავაზოს მხარდაჭერა, როგორიცაა; კამპანიის ღონისძიებათა ჩატარების მიზნით სხდომათა დარბაზებით უფასოდ სარგებლობა. ნებისმიერ შემთხვევაში პარტიებისთვის და კანდიდატებისთვის, ორივე ფინანსური და არაფინანსური სახის მხარდაჭერა გაწეულ უნდა იქნას თანაბარი შესაძლებლობების საფუძველზე.
