ბათუმის საკრებულოს თავმჯდომარე თანამდებობიდან გადადგა, ამის შესახებ რამაზ ჯინჭარაძემ დღეს გამართულ სხდომაზე განაცხადა. ჯინჭარაძე თანამშრომლებს გამოემშვიდობა და სამახსოვრო ფოტო გადაიღო.
მიუხედავად იმისა, რომ რამაზ ჯინჭარაძემ თავმჯდომარის პოსტი დატოვა, საკრებულოს წევრის სავარძელს ვერ შეელია და ადგილი შეინარჩუნა. არჩევნებში წაგების შემთხვევაში ის კვლავ აპირებს წარმომადგენლობით ორგანოში საქმიანობის გაგრძელებას.
მაშინ, როდესაც „ქართული ოცნება“ საკონსტიტუციო უმრავლესობის მოპოვებაში დარწმუნებულია, უცნობია, რა რისკები დაინახა ან რა მიზნით შეინარჩუნა სტატუსი რამაზ ჯინჭარაძემ. ბათუმის საკრებულოს უკვე ყოფილმა თავმჯდომარემ „აჭარა თაიმსის“ კითხვების შინაარსი ვერ გაიგო და ამ მოტივით ინტერვიუზე უარი გვითხრა.
აჭარა თაიმსი: რატომ შეინარჩუნეთ საკრებულოს წევრის სტატუსი?
რამაზ ჯინჭარაძე: გაუგებარია რას მეკითხებით, კითხვის შინაარსი ვერ მივხვდი.
აჭარა თაიმსი: არჩევნებში დამარცხების შიშით ადგილს ინახავთ თუ რატომ მიიღეთ ეს გადაწყვეტილება?
კითხვას რამაზ ჯინჭარაძემ არ უპასუხა და კაბინეტისგენ გაემართა.
ინფორმაციისთვის: ბათუმის საკრებულოს თავმჯდომარის მოვალეობას პირველი მოადგილე, ირაკლი თავდგირიძე შეასრულებს. ეს უკანასკნელი საკრებულოში გიორგი გახარიას პარტიის მანდატით მოხვდა, თუმცა მან მოგვიანებით, “საქართველოსთვის” დატოვა. მაშინ თავდგირიძემ ფეისბუქზე დაწერა, რომ მისთვის მიუღებელია ოპოზიციასთან კოალიციაში შესვლა.
“ჩემთვის ბათუმის საკრებულოს მომავალი წევრისთვის, კატეგორიულად მიუღებელია ნაცმოძრაობასთან (ლელოს ჩათვლით) ნებისმიერი სახით თანამშრომლობა, მითუმეტეს მათთან კოალიცია და თანამდებობის გადანაწილებაზე კონსულტაციაც კი! შესაბამისად, ვტოვებ პარტია საქართველოსთვის ბათუმის ორგანიზაციის ხელმძღვანელის თანამდებობას და საკრებულოში საქმიანობას გავაგრძელებ როგორც დამოუკიდებელი დეპუტატი, ჩემი სინდისის კარნახით და ბათუმელების საკეთილდღეოდ! არა ნაცებს! არა ბოროტებას! ნაცმოძრაობა ვერასოდეს იქნება ბათუმის უმრავლესობა საკრებულოში!” – წერდა მაშინ ირაკლი თავდგირიძემ.
“გასაყიდი უნდა გაიყიდოს” – ასე გამოეხმაურა ირაკლი თავდგირიძის გადაწყვეტილებას გახარიას პარტია.
ცნობისთვის: რამაზ ჯინჭარაძე, “ქართული ოცნების” უმაღლესი საბჭოს დელეგატობის კანდიდატია.
