ფოტო: აჭარა თაიმსი / ბაჩანა საჯაია
არასამთავრობო ორგანიზაციების ინფორმაციით, საპროტესტო აქციებზე დაკავებული ქალების ნაწილის მიმართ პოლიციის მიერ ადგილი ჰქონდა პოლიციის მხრიდან ფიზიკური ძალადობის, არაადამიანური, ღირსების შემლახავი მოპყრობის, სექსუალური შევიწროების და გაუპატიურების მუქარის ფაქტებს.
“მოგეხსენებათ, ნოემბერ-დეკემბრის თვეში პოლიცია აქციებზე აკავებდა არა მხოლოდ კაცებს, არამედ ქალებსაც. 28 ნოემბრის შემდეგ, ქართულ არასამთავრობო ორგანიზაციათა ცხელ ხაზზე შემოვიდა 10 შეტყობინება 10 ქალის დაკავების შესახებ, თუმცა, სამწუხაროდ, ოფიციალური მონაცემების არარსებობის გამო, ჩვენ არ გვაქვს ზუსტი მონაცემები და სტატისტიკა თუ რამდენი ქალი დააკავეს საპროტესტო აქციების მიმდინარეობის დროს.
შემაძრწუნებელია ის გარემოება, რომ აქციაზე დაკავებულმა რამდენიმე ქალმა საჯაროდ ისაუბრა მათ მიმართ დაკავების დროს და შემდგომ პერიოდში პოლიციის მხრიდან ფიზიკური ძალადობის, არაადამიანური, ღირსების შემლახავი მოპყრობის, სექსუალური შევიწროების და გაუპატიურების მუქარის ფაქტების თაობაზე.
ქალების განცხადებით, დაკავების პროცესში სპეცრაზმი მათ ფიზიკურად გაუსწორდათ, ემუქრებოდნენ გაუპატიურებით და სიცოცხლის მოსპობით. გაუპატიურების მუქარის კიდევ უფრო სიცხადისთვის, ადგილი ჰქონდა გაუპატიურების აქტის აღწერას, უწმაწური სიტყვების გამოყენებას, დაკავების სპეციალური მანქანისკენ წაყვანის მუქარას, რაც მსხვერპლისთვის კიდევ უფრო დამაჯერებელს ხდიდა აღნიშნულ სიტყვებს.
აქციაზე დაკავებული ქალის მიერ გაკეთებული საჯარო განცხადების თანახმად, დაკავების მანქანაში მას არ მისცეს საშუალება სკამზე დაჯდომის, მთელი გზა მუხლებზე დაჩოქილი ამგზავრეს და ამასთან, ადგილი სექსუალური შევიწროების ფაქტს. ერთ-ერთი დაკავებული ქალის მიერ გაკეთებული საჯარო განცხადებით, მას პოლიციის განყოფილებაში გადაუღეს ვიდეოები, ამცირებდნენ სექსუალური შინაარსის კომენტარებით.
აქციის მონაწილე ერთ-ერთმა ქალმა, რომელსაც სახეზე ფიზიკური დაზიანებები აღენიშნებოდა, საჯაროდ გააკეთა განცხადება, რომ ის აქციის დაშლის დროს პოლიციელებმა თითქოსდა გარიდების მიზნით გაიყვანეს, რის შემდეგაც სცემეს. დაუშვებელია სახელმწიფოს წარმომადგენლის მხრიდან ასეთი ქმედებების განხორციელება, ან ისეთი ქმედებების შესრულების მოთხოვნა, რომელიც დამამცირებელია, ლახავს მოქალაქის ღირსებას და მიმართულია სექსუალური თუ სხვა ნიშნით შევიწროებისკენ.
წამება, არაადამიანური, ღირსების შემლახავი მოპყრობა არის აკრძალული და წარმოადგენს სისხლის სამართლის დანაშაულს. ჩვენ გვსურს, მივმართოთ იმ ქალებს, რომელთაც შესაძლოა შეემთხვათ მსგავსი ფაქტები და ჯერ საჯაროდ არ უსაუბრიათ, ჩვენ, ქართული არასამთავრობო ორგანიზაციები მზად ვართ, აღმოგიჩინოთ სამართლებრივი დახმარება, კონფიდენციალურობის სრული დაცვით და წარმოვადგინოთ თქვენი ინტერესები როგორც ქართულ, ასევე საერთაშორისო სამართლებრივ მექანიზმებში. ასევე, დაგეხმაროთ, რომ მიიღოთ ყველა საჭირო სარეაბილიტაციო სერვისი”. – აღნიშნულია NGO-ების განცხადებაში.
