აშშ-ის სახელმწიფო დეპარტამენტმა ახალი ზომები დააანონსა, რომლებიც მიზნად ისახავს „სამშობიარო ტურიზმის“ წინააღმდეგ ბრძოლას. ეს ტერმინი აღნიშნავს პრაქტიკას, როცა მშობლები აშშ-ში ჩადიან ტურისტული ვიზით, რათა შვილი ამერიკის ტერიტორიაზე გააჩინონ და ამ გზით მას ავტომატურად აშშ-ის მოქალაქეობა მიანიჭონ.
სახელმწიფო დეპარტამენტის საკონსულო საქმეთა ბიუროს განცხადებაში ნათქვამია, რომ ეს პრაქტიკა მიუღებელია და არღვევს ვიზების გაცემის არსს. უწყება ხაზს უსვამს, რომ ასეთი ქმედებები შეიძლება ამერიკელი გადასახადის გადამხდელებისთვის გაუმართლებელი სამედიცინო ხარჯების გადახდის მიზეზი გახდეს.
„ყველა, ვინც „სამშობიარო ტურიზმის“ მეშვეობით აშშ-ის საიმიგრაციო სისტემას ბოროტად იყენებს, შესაძლოა, მომავალში ვიზა და აშშ-ში მოგზაურობის უფლება ვერ მიიღოს“, – აღნიშნულია განცხადებაში.
ამასთან, სახელმწიფო დეპარტამენტი აცხადებს, რომ ეს ნაბიჯები კიდევ ერთი გზაა ამერიკელი საზოგადოებისა და გადასახადის გადამხდელთა ინტერესების დასაცავად. ახალი რეგულაციები კონსულებს უფლებას აძლევს, უარი თქვან ვიზის გაცემაზე იმ პირებისთვის, ვისაც ეჭვი აქვთ, რომ ვიზის მიღების მიზანი მშობიარობაა აშშ-ში.
