ამერიკის შეერთებული შტატების მთავრობა საქართველოს თავდაცვის სამინისტროს 10 431 459.90 აშშ დოლარის ღირებულების გრანტს გამოუყოფს. გრანტის მიღების განგარგულებას ხელი „ქართული ოცნების“ პრემიერ-მინისტრმა ირაკლი კობახიძემ უკვე მოაწერა.
დოკუმენტის მიხედვით, გრანტი სხვადასხვა პროგრამის (PB-B-WFK, DT-B-WAZ, PB-B-WFJ, DT-B-WBC და DT-B-WBA) ფარგლებში საქართველოს თავდაცვის სამინისტროსთვის საქონლის გადმოცემას ითვალისწინებს, რომლის საერთო ღირებულება 10 431 459.90 აშშ დოლარს შეადგენს.
მთავრობის განკარგულებაში აღნიშნულია, რომ გადაწყვეტილება მიღებულია „საქართველოში საგარეო დახმარების კოორდინაციისა და საქართველოს სამინისტროების მიერ გრანტის გაცემის წესის დამტკიცების შესახებ“ 2015 წლის 1 ივლისის №238 დადგენილების საფუძველზე.
ამავე დოკუმენტით, „გრანტების შესახებ“ საქართველოს კანონის მე-4 მუხლის „გ“ ქვეპუნქტის შესაბამისად, საქართველოს თავდაცვის სამინისტროს მიენიჭა უფლებამოსილება, მიიღოს აღნიშნული გრანტებით განსაზღვრული კავშირგაბმულობის საშუალებები და სხვა სახის საქონელი. გრანტის მიზანი საქართველოს თავდაცვის შესაძლებლობების გაძლიერებაა.
