სანიაღვრე არხი ახალ ბულვარში, საიდანაც ზღვაში კანალიზაცია ჩაედინება
ბათუმის ახალ ბულვარში, ფეკალური მასების ზღვაში ჩადინებას ადგილობრივი მოსახლეობა აპროტესტებს. მათი თქმით, მიუხედავად პრობლემის ხილვადობისა, შესაბამისი უწყებები და ადგილობრივი ხელისუფლება რეაგირებას არ ახდენენ.
როგორც ადგილობრივები აცხადებენ, ზღვის დაბინძურების გარდა, ბულვარში გაუსაძლისი, სპეციფიკური სუნი დგას, რაც პირდაპირ აისახება დასახლებაში ცხოვრების ხარისხზე, ასევე, ზაფხულში ბინების გაქირავების შესაძლებლობებზე. მათი თქმით, დეველოპერებს უჭირთ ბინების გაყიდვა, ხოლო ტურისტულ სეზონზე – გაქირავება.
„ჩანს, ხილულია ეს ყველაფერი. ზაფხულში საშინელი სიტუაციაა. ახალ ბულვარში ბანაობა შეუძლებელი ხდება. თუ არ ვცდები შამბოებიდან ნაწრეტი წყალი მიედინება ზღვაში. ადლიაში, წლებია კანალიზაციის პრობლემაა და სამწუხაროა რომ აქამდე ვერ მოგვარდა ეს სიტუაცია,“ – განაცხადა დავით შალიკაძემ „აჭარა თაიმსთან“ საუბარისას.
ბათუმის საკრებულოს დეპუტატის, პარტია „ახალის“ წევრის ბაჩი მექვაბიშვილის, თქმით აპარტამენტებისა და სასტუმროების მფლობელები შამბოებს სანიაღვრე არხზე უკანონოდ აერთებენ, რათა რეზერვუარების გასუფთავების ხარჯები დაზოგონ.
„ადლიის განაშენიანება ინტენსიურად მიმდინარეობს, ამის ფონზე არაა საკმარისი კანალიზაციისთვის შამბოები. ზოგიერთი კორპუსის მეპატრონეს კანალიზაცია სანიაღვრე არხზე აქვს დაერთებული. ხედავთ როგორ ჩაედინება ზღვაში ფეკალური მასები ამ კორპუსებიდან წამოსული,“ – განაცხადა მექვაბიშვილმა „აჭარა თაიმსთან“.
მიუხედავად იმისა, რომ საკითხი საკრებულოს სხდომაზეც გახმოვანდა, ადგილობრივი თვითმმართველობის წარმომადგენლებს, მათ შორის მმართველი პარტია „ქართული ოცნების“ დეპუტატებს, დანაშაულზე რეაქცია არ ჰქონიათ. სხდომის თავმჯდომარემ კი მხოლოდ აღნიშნა, რომ „საკითხით დაინტერესდება“.
ინფორმაციისთვის: სპეციალისტების თქმით, ზღვაში ფეკალური მასებისა და დაუმუშავებელი კანალიზაციის ჩადინება სერიოზულ საფრთხეს უქმნის როგორც გარემოს, ისე ადამიანთა ჯანმრთელობას. ასეთი დაბინძურება იწვევს ზღვის ეკოსისტემის დაზიანებას, წყალმცენარეთა და წყალმცხოვრებლების მასობრივ დაღუპვას, ხოლო წყალში ჩასული პათოგენური ბაქტერიები და ვირუსები ადამიანებში ნაწლავური და კანის ინფექციების გავრცელებას იწვევს. მსოფლიო ჯანდაცვის ორგანიზაციის მონაცემებით, ზღვის წყალში ფეკალური დაბინძურება პირდაპირ კავშირშია წყალთან დაკავშირებული დაავადებების გავრცელებასთან.
ცნობისთვის: ცხადია, „აჭარა თაიმსი“ კითხვებით მიმართავდა ბათუმის მერიას. თუმცა, როგორც ცნობილია, „ქართული ოცნების“ ხელისუფლება არ თანამშრომლობს დამოუკიდებელ და ობიექტურ მედიასთან — მათ შორის, ისინი საჯარო შეხვედრებსაც იზოლირებულ სივრცეში ატარებენ. იმ შემთხვევაში, თუ ამ მასალის გამოქვეყნების შემდეგ თვითმმართველობას სურვილი გაუჩნდება საკუთარი პოზიციის დაფიქსირების, მათი კომენტარი სტილის დაცვით გამოქვეყნდება და მასალა განახლდება.
