ბათუმის აკვატორიაში შავი ზღვის დაბინძურების ფაქტი გამოვლინდა, რის გამოც უცხოური დროშის ქვეშ მცურავი გემი სასამართლომ სამართალდამრღვევად ცნო და 100 000 ლარის ოდენობის ჯარიმა დააკისრა.
გარემოსდაცვითი ზედამხედველობის დეპარტამენტის ინფორმაციით, სამართალდარღვევა სასაზღვრო პოლიციის თანამშრომლებთან ერთად ჩატარებული მონიტორინგის ფარგლებში დაფიქსირდა. დადგინდა, რომ გემმა ზღვა სამეურნეო წყლებით დააბინძურა.
უწყების ცნობით, შედგენილი ადმინისტრაციული სამართალდარღვევის ოქმის საფუძველზე საქმე სასამართლოში გადაიგზავნა, რომელმაც გემი სამართალდამრღვევად ცნო. სანქციის გარდა, გემს დაეკისრა გარემოსთვის მიყენებული ზიანის ანაზღაურებაც.
გემს საქართველოს ტერიტორიული წყლების დატოვებისა და ნაოსნობის გაგრძელების უფლება მხოლოდ დაკისრებული ჯარიმისა და ზიანის სრულად ანაზღაურების შემდეგ მიეცა.
