ერთ-ერთ ფეისბუქჯგუფში, სადაც განცხადებები ძირითადად, რუსულ ენაზე ქვეყნდება, მომხმარებლები რუსულენოვანი სახელმძღვანელოების ფოტოებს ხშირად აქვეყნებენ მათი გაყიდვის მიზნით. კომენტარებიდან ასევე ირკვევა, რომ რუსეთში დაბეჭდილ წიგნებს ბათუმის კერძო სკოლებში იყენებენ.
აღნიშნული „სქრინშოტები“ „აჭარა თაიმსს“ მოქალაქეებმა მიაწოდეს და აღნიშნეს, რომ ბათუმის კერძო სკოლებში მასწავლებლები, რამდენიმე საგნის სწავლების პროცესში, მუდმივად იყენებენ რუსეთში დაბეჭდილ სახელმძღვანელოებს.
„ოფიციალურად, რუსულად ნათარგმნი და საქართველოში დაბეჭდილი სახელმძღვანელო არსებობს, მაგრამ ბევრი მასწავლებელი იყენებს რუსულ სახელმძღვანელოს. აგრეთვე, არსებობს მათემატიკის სახელმძღვანელო (გოგიშვილი), რომელიც საშინლად უხარისხოა და რუსულ სექტორში მასობრივად იყენებენ რუსეთში დაბეჭდილ სახელმძღვანელოებს. რაც შეეხება რუსულ ენასა და ლიტერატურას, საქართველოში შექმნილი და დაბეჭდილი სახელმძღვანელოები არ არსებობს და გამოიყენება რუსული სტანდარტის (ФГОС) სახელმძღვანელოები. ბუნება კი საქართველოშია დაბეჭდილი და ქართულ სტანდარტს შეესაბამება“, – ამბობს ერთ-ერთი მოქალაქე.
მან ასევე გამოგვიგზავნა ერთ-ერთი სახელმძღვანელო პორტატული დოკუმენტის ფორმატის (PDF) სახით, რომელსაც ყურადღებით გადავხედეთ. ესაა ა. ა. პლეშაკოვის „Окружающий мир“ (გარემომცველი სამყარო) მესამეკლასელისთვის, რომელიც დაშვებულია რუსული სკოლებისთვის, რუსეთის ფედერაციის განათლების სამინისტროს მიერ. სახელმძღვანელო გამოცემულია 2023 წელს.
განსაკუთრებული ყურადღება მიიპყრო სახელმძღვანელოს 30-ე და 31-ე გვერდზე მოცემულმა ინფორმაციამ, რომელიც რუსული სკოლის მესამეკლასელს უნერგავს იდეას რუსული ჯარის უძლეველობის შესახებ.
„თანამედროვე რუსეთის არმია აგრძელებს უფროსი თაობების ტრადიციებს: ერთგულად ემსახუროს სამშობლოს, მამაცურად, ღირსებითა და პატივით დაიცვას იგი. ჩვენ ვამაყობთ ჩვენი არმიით – ქვეყნისა და მთელი ხალხის საიმედო დამცველით.“ ვკითხულობთ 30-ე გვერდზე, ხოლო მომდევნო გვერდზე მოსწავლისგან ითხოვს, უფროსების დახმარებით აიღოს ინტერვიუ სამხედრო მოსამსახურეებისგან, რუსული გვარდიისა და საგანგებო სიტუაციების სამინისტროს თანამშრომლებისგან, ჩაიწეროს მათი საუბარი, გადაუღოს ფოტოები და ამის შემდეგ, მოამზადოს ვიზუალური მასალა. „სამუშაოს შედეგები გააფორმეთ სტენდების, ალბომების, სამახსოვრო ფურცლებისა და ფოტოკოლაჟების სახით. შესაძლებელია, მთელი ინფორმაცია შეკრიბოთ ერთ დიდ წიგნში – „ვინ გვიცავს“, რომელიც გააფორმებთ ფოტოებითა და ნახატებით. სამუშაო შეაჯამეთ საზეიმო პრეზენტაციაზე“, – წერია იქვე.
ესე იგი, საქართველოში ქართული სკოლის რუსული სექტორის მოსწავლემ უნდა მოამზადოს რუსი სამხედროების ინტერვიუები, გააკეთოს ვიზუალური მასალა და გაიტანოს პრეზენტაციაზე. სავარაუდოდ, საკლასო ოთახშიც გამოაკრავენ, მშობლები ვიდეოსა და ფოტოსაც გადაიღებენ და სოციალურ ქსელებში განათავსებენ.
აქვე საინტერესო დეტალიც: რუსეთის მოქალაქეებისთვის ეს საქართველოში ცხოვრების პირველი წელი არაა. შესაბამისად, საქართველოს განათლების სამინისტრომ უნდა იცოდეს, რომელი სახელმძღვანელოებით სწავლობენ მათი შვილები ქართულ სკოლებში და რამდენად შეესაბამება ქართული სახელმწიფოს ინტერესებს ასეთი პროპაგანდისტული ნარატივების შეტანა ქართულ საგანმანათლებლო სივრცეში. ვთქვათ, მოსწავლეებმა რუსი სამხედროები დისტანციურად ჩაწერეს, სკოლა ხომ საქართველოშია და პრეზენტაციაც აქ უნდა გაიმართოს (ან უკვე გაიმართა და კიდევ არაერთი გაიმართება)? შესაბამისად, ქართული საგანმანათლებლო სისტემის წარმომადგენლებს უნდა ჰქონდეთ პასუხი კითხვაზე, თუ მათ ამის შესახებ იციან, რა ზომები მიიღეს, ან რას აპირებენ? თუ არ იციან, რატომ აქამდე არ დაინტერესდნენ იმ სახელმძღვანელოებით, რომლებსაც რუსული სექტორის მასწავლებლები იყენებენ? საერთოდ, არსებობს რაიმე საგანმანათლებლო პოლიტიკა, რომლის მოთხოვნებსაც საქართველოში უცხო ქვეყნის მოქალაქეების სასკოლო განათლება ადეკვატურად უნდა პასუხობდეს?
ეს რომ არა მხოლოდ განათლების საკითხია, არამედ პოლიტიკურად მეტად მგრძნობიარე თემაც, რომელიც სახელმწიფო ინტერესებს არა მხოლოდ ეწინააღმდეგება, არამედ ამ ქვეყნის მოქალაქეებსაც შეურაცხყოფს, დასტურდება კიდევ ერთი მნიშვნელოვანი ფაქტორით: ამავე სახელმძღვანელოს 97-ე გვერდზე მოცემულია რუსეთისა და მისი სამეზობლო სახელმწიფოების რუკა. ამ რუკაზე საქართველო, აფხაზეთი და სამხრეთ ოსეთი სხვადასხვა ქვეყნადაა დატანილი და რუკის ლეგენდაშიც ასეა გამოტანილი.
რუკის ქვეშ განმარტებულია, რომ რუსეთის სამხრეთით, შავ და კასპიის ზღვებს შორის, მდებარეობს აფხაზეთი, სამხრეთ ოსეთი, საქართველო და აზერბაიჯანი და მერე ჩამოთვლილია თითოეულის დედაქალაქი.
ბათუმში, ერთ-ერთი კერძო სკოლის პედაგოგმა „აჭარა თაიმსთან“ პირად საუბარში აღნიშნა, რომ სკოლაში მოსწავლეები რუსეთში დაბეჭდილი წიგნებით, სკოლის ოფიციალური ნებართვის გარეშე სწავლობენ. მისი თქმით, რუსულენოვანი წიგნები პედაგოგებს კლასებში არაოფიციალურად შეაქვთ და სასწავლო პროცესში იყენებენ.
„აჭარა თაიმსმა“ ბათუმში მოქმედი კერძო სკოლების ნაწილთან დაკავშირება შეძლო. თუმცა სკოლების წარმომადგენლები რუსეთში დაბეჭდილი სახელმძღვანელოების გამოყენების ფაქტს კატეგორიულად უარყოფენ.
აღნიშნულ ფაქტს კატეგორიულად უარყოფენ აჭარის განათლების სამინისტროშიც.
„საქართველოს ავტორიზებულ საგანმანათლებლო დაწესებულებებში მსგავსი ფაქტები არ ფიქსირდება და შესაბამისად ასეთ ინფორმაციაზე აჭარის განათლებისა და სპორტის სამინისტრო კომენტარს ვერ გააკეთებს,“ – განუცხადეს „აჭარა თაიმსს“ სამინისტროში.
რატომ გაურბიან კერძო სკოლების წარმომადგენლები რუსულ კანონზე საუბარს
5 658 პირველკლასელი და 72 907 მოსწავლე – ახალი სასწავლო წელი აჭარაში
საქართველოში სკოლების რაოდენობა შემცირდა – საქსტატი
ვინ და როგორ აწყობს რუსი ბროკერების ტურებს ბათუმსა და ჩაქვში – ჟურნალისტური გამოძიება
სკოლებისთვის 750-მდე ქარხნულად დამზადებული დროებითი შენობის შეძენა იგეგმება
