“აჭარა თაიმსი” ბათუმის მერიისგან პერიოდულად სხვადასხვა სახის საჯარო ინფორმაციას ითხოვს, რასაც თვითმმართველობა კანონით დადგენილ ვადებში, ზოგიერთ შემთხვევაში კი საერთოდ არ გასცემს. ცალკეულ საკითხებზე უწყებიდან პასუხისმგებელი პირების კომენტარების მიღებაც ფაქტობრივად შეუძლებელია.
ჩვენი დაკვირვებით, დროის გაჭიანურების მიზნით, მერია შესაბამისი ინფორმაციის გაცემისას მეტწილად საჯარო ინფორმაციის გამოთხოვის პრაქტიკას მიმართავს, რითაც ინფორმაციას ბლოკავს.
ბათუმის მერიის ადმინისტრაციის უფროსს ჩვენ საკრებულოს სხდომაზე შევხვდით, სადაც ნუკრი დეკანაძეს კანონის დარღვევაზე განმარტება ვთხოვეთ. მანამდე ის ჩვენს სატელეფონო ზარებს არ პასუხობდა.
– ნუკრი დეკანაძე: საკმაოდ მოცულობით დოკუმენტაციას ითხოვთ, რასაც დამუშავება და დრო სჭირდება.
– AJARATIMES.GE: ეს სიმართლეს არ შეესაბამება. ინფორმაციები, რასაც ჩვენ ვითხოვთ ერთზე მეტ ფურცელსაც არ საჭიროებს…
– ნუკრი დეკანაძე: ზოგიერთი ინფორმაცია არქივშია და მის მოძიებას დრო სჭირდება…
– AJARATIMES.GE: სხვა მუნიციპალიტეტები იგივე ინფორმაციის მოწოდებას გაცილებით ნაკლებ დროს ანდომებენ
– ნუკრი დეკანაძე: დუმილი (ავტ.)
აღსანიშნავია ის ფაქტი, რომ საჯარო ინფორმაციის მიღების პრობლემა აქვს თავისუფალი სარედაქციო პოლიტიკის მქონე ყველა მედიასაშუალებას.
IDFI-ის კვლევის თანახმად, 2013 წლიდან, საქართველოს ხელისუფლებას, ინფორმაციის პროაქტიული გამოქვეყნების სტანდარტის გაუმჯობესების მიზნით, მნიშვნელოვანი ნაბიჯები არ გადაუდგამს.
“აღსანიშნავია ის ფაქტი, რომ საჯარო დაწესებულებები ინფორმაციის პროაქტიული გამოქვეყნების სტანდარტის დამკვიდრების საწყის ეტაპზე, უფრო მაღალი პასუხისმგებლობით ასრულებდნენ მათზე დაკისრებულ ვალდებულებებს. მაგალითად, 2014 წლის მონიტორინგის შედეგებით, საჯარო დაწესებულებების საერთო მაჩვენებელი შეადგენდა 71%-ს, რაც 11%-ით აღემატება 2021 წლის ანალოგიურ მაჩვენებელს,” – ვკითხულობთ კვლევაში.
ინფორმაციისთვის: კონსტიტუციის 24-ე მუხლი: „ყოველ ადამიანს აქვს უფლება თავისუფლად მიიღოს და გაავრცელოს ინფორმაცია, გამოთქვას და გაავრცელოს თავისი აზრი ზეპირად, წერილობით ან სხვაგვარი საშუალებით“.
კონსტიტუციის 41-ე მუხლი: „საქართველოს ყოველ მოქალაქეს უფლება აქვს კანონით დადგენილი წესით გაეცნოს სახელმწიფო დაწესებულებებში მასზე არსებულ ინფორმაციას, აგრეთვე იქ არსებულ ოფიციალურ დოკუმენტებს, თუ ისინი არ შეიცავენ სახელმწიფო, პროფესიულ ან კომერციულ საიდუმლოებას.“
საჯარო დაწესებულებაში დაცული ინფორმაციის ხელმისაწვდომობას საქართველოს ასევე, ავალდებულებს ევროპის ადამიანის უფლებათა და თავისუფლებათა კონვენციის მე10 მუხლი, რომლის თანახმადაც, გამოხატვის თავისუფლება მოიცავს ადამიანის უფლებას, მიიღოს და გაავრცელოს ინფორმაცია და მოსაზრებები საჯარო ხელისუფლების ჩარევის გარეშე.
