“ევკალიპტის ხის მოჭრაზე ნებართვა არ გაცემულა, მათ შორის არც ტოტების გადაბელვაზე,” – გვითხრეს ბათუმის მერიის გამწვანებისა და ლანდშაპტური დაგეგმარების სამსახურში.
ბათუმში, ავტოსადგურის ტერიტორიაზე, ხის შესაძლო მოჭრის შესახებ “აჭარა თაიმს” ადგილობრივებმა აცნობეს. მათი თქმით, ქუჩის სარეაბილიტაციო სამუშაოების მიზეზით ევკალიპტის მოჭრაა დაგეგმილი.
“Მიმდინარეობს რეკონსტრუქცია. Აქ ორი ხე იდგა, რომლებიც მოჭრეს. Ახლა, ბათუმის მარგალიტს, ამ 150 წლის ევკალიპტსაც უპირებენ მოჭრას, რადგან მშენებლობას ხელს უშლის. Ამ ევკალიპტის ხემ გადაიტანა საბჭოთა რეჟიმი. Მან გაუძლო ყველაფერს და საბჭოთა ხელისუფლებამაც კი შეუნარჩუნა იგი. Ნუთუ თავისუფალ საქართველოს არ შეუძლია მისი შენარჩუნება,” – ამბობს ტერიტორიაზე მცხოვრები.
ბათუმის მერიის გამწვანებისა და ლანდშაპტური დაგეგმარების სამსახურის ინფორმაციით, ევკალიპტის ხე კერძო ტერიტორიაზეა.
ბათუმში კერძო ტერიტორიაზე ხის მოჭრა რეგულირდება – რა ნებართვები უნდა მიიღოთ
ბათუმში კერძო საკუთრებაში არსებულ მიწის ნაკვეთზე ხის მოჭრა გარკვეულ რეგულაციებს ექვემდებარება. მიუხედავად იმისა, რომ ხე კერძო პირის საკუთრებაშია, მისი მოჭრის პროცესში შეიძლება საჭირო გახდეს შესაბამისი ნებართვები.
საქართველოს ეროვნული სატყეო სააგენტოს მიხედვით, კერძო საკუთრებაში მოპოვებული ხის ტრანსპორტირებისთვის აუცილებელია ადგილობრივი მუნიციპალიტეტის მიერ გაცემული ხე-მცენარეების ადგილწარმოშობის ცნობა. ეს დოკუმენტი სავალდებულოა, თუ მოჭრილი ხის მორის დიამეტრი 12 სანტიმეტრს აღემატება და მისი სიგრძე ერთ მეტრზე მეტია. ასევე, ასეთ მორებს უნდა ჰქონდეს სპეციალური ფირნიშებით მარკირება.
ამასთან, ანალოგიურ თემებზე, წარსულში, ბათუმის მერიის გამწვანებისა და ლანდშაფტური დაგეგმარების სამსახურის განმატებების თანახმად, მერია კერძო ტერიტორიაზე ხეების მოჭრაზე ნებართვებს არ გასცემს და არც მის აკრძალვას ახორციელებს. თუმცა, იმ შემთხვევებში, როდესაც კერძო ტერიტორიაზე მშენებლობა მიმდინარეობს, გამწვანების საკითხი უნდა იყოს გათვალისწინებული.
მიუხედავად იმისა, რომ კერძო პირებს საკუთრებაში არსებული ხეების მოჭრის უფლება აქვთ, სატრანსპორტო და ეკოლოგიური რეგულაციების გამო, მნიშვნელოვანია შესაბამისი ნებართვების მოპოვება, რათა თავიდან იქნას აცილებული სამართლებრივი პრობლემები.
ინფორმაციისთვის: ბათუმში, სევერიანე აჭარელის (ყოფილი მაიაკოვსკის) ქუჩაზე მდებარე ავტოსადგური შეიძინა აჭარის მთავრობის ყოფილმა თავმჯდომარემ, არჩილ ხაბაძემ. მისი კომპანია, “გუმბათი ჰაბი”, ამ ადგილზე ორი 43-სართულიანი ცათამბჯენის მშენებლობას გეგმავს. პროექტი მოიცავს სასტუმროს ტიპის აპარტამენტებს, საზოგადოებრივ სივრცეებსა და მიწისქვეშა ავტოსადგომებს.
