13 თებერვალს აშშ-ის ფედერალურმა მოსამართლემ, ამირ ალიმ, დროებით დაბლოკა ტრამპის ადმინისტრაციის გადაწყვეტილება, რომელიც უცხოური დახმარების შეჩერებას ეხებოდა. მოსამართლემ გადაწყვეტილება მიიღო ორი ორგანიზაციის საჩივრის საფუძველზე, რომლებიც USAID-ის დაფინანსებით მუშაობდნენ.
მოსამართლეს გადაწყვეტილება მთლიანად შესაბამისი აღმასრულებელი ბრძანების წინააღმდეგ არ მიუღია. სასამართლოს ბრძანება დროებით უკრძალავს მოქმედ ადმინისტრაციას იმ საგარეო დახმარებების შეჩერებას ან გაუქმებას, რომელიც მოქმედებდა ტრამპის თანამდებობაზე მოსვლამდე, ანუ 20 იანვრამდე.
ტრამპის გეგმების მიხედვით, USAID-ის 2000-ზე მეტი თანამშრომელი უნდა გათავისუფლებულიყო, მაგრამ მოსამართლემ დროებით დაბლოკა ეს გადაწყვეტილებაც, რაც USAID-ის თანამშრომლებისთვის მნიშვნელოვანი გამარჯვება გახდა.
