შინაგან საქმეთა სამინისტროს ინფორმაციით, დიდი ოდენობით ჩადენილი თაღლითობისა და თაღლითობის მცდელობის ფაქტებზე სამი პირი დააკავეს 1998 წელს დაბადებული გ.ა., 1996 წელს დაბადებული, წარსულში ნასამართლევი გ.გ. და 1984 წელს დაბადებული ჯ.შ.
გამოძიების მიხედვით, ბრალდებულებმა სხვადასხვა დროს, ბათუმში, სწრაფი ჩარიცხვის აპარატებში ფულადი თანხის ნაცვლად ყალბი კუპიურები განათავსეს. აპარატებმა აღნიშნული კუპიურები რეალურ ფულად აღიქვა, რის შედეგადაც ბრალდებულების მიერ მითითებულ სხვადასხვა ანგარიშზე 8000 ლარამდე ჩაირიცხა.
უწყების ცნობით, ყალბი კუპიურების ნაწილის ანგარიშებზე ასახვა ბრალდებულებმა ვერ მოახერხეს.
ჩატარებული საგამოძიებო მოქმედებების ფარგლებში, მათ შორის ბრალდებულების პირადი და ავტომობილების ჩხრეკისას, ყალბი კუპიურები ნივთმტკიცებად ამოიღეს.
გამოძიება სისხლის სამართლის კოდექსის 180-ე და 19-180-ე მუხლებით მიმდინარეობს, რაც 9 წლამდე ვადით თავისუფლების აღკვეთას ითვალისწინებს.
