ბათუმში, „თავისუფალ სივრცეში“ გაეროს მოსახლეობის ფონდის (UNFPA) საქართველოს ოფისის და გამომცემლობა „ინტელექტის“ ერთობლივი ინიციატივით გაიხსნა „თანასწორობის კუთხე“. პროექტის ფარგლებში, „თავისუფალ სივრცეს“ ასამდე ახალი წიგნი შეემატა.
ღონისძიებაზე გენდერული თანასწორობის მნიშვნელობაზე, ქალების და გოგოების გაძლიერებასა და უფლებებზე ისაუბრეს. თანასწორობის კუთხეების“ გახსნა საქართველოს სხვადასხვა რეგიონში გაეროს მოსახლეობის ფონდის ინიციატივაა, რომელიც 2018 წლიდან პარტნიორ ორგანიზაციებთან ერთად ხორციელდება.
ინიციატივა გულისხმობს სკოლების, ადგილობრივი ბიბლიოთეკების და ახალგაზრდების თავშეყრის სივრცეების თანამედროვე ლიტერატურით აღჭურვას. წიგნები, რომლებიც თემატურად დაკავშირებულია თანასწორობის, ტოლერანტობისა და თავისუფლების იდეებთან, მოზარდებს საშუალებას აძლევს, აიმაღლონ ცნობიერება უნივერსალურ ღირებულებებზე. ბათუმის „თანასწორობის კუთხე“ არის საქართველოს მასშტაბით რიგით ოცდამეშვიდე.
