შინაგან საქმეთა სამინისტროს აჭარის პოლიციის დეპარტამენტის თანამშრომლებმა პროსტიტუციის ხელშეწყობისა და პროსტიტუციისთვის ადგილის გადაცემის ბრალდებით ჩინეთისა და ტაილანდის შვიდი მოქალაქე დააკავეს.
შსს-ის ინფორმაციით, სამართალდამცველების მიერ ჩატარებული კომპლექსური საგამოძიებო მოქმედებების შედეგად, მათ შორის მოსამართლის განჩინების საფუძველზე განხორციელებული აუდიო და ვიდეო ჩაწერების ანალიზით, დადგინდა, რომ ბრალდებულები ბათუმში მდებარე სხვადასხვა ობიექტებში პროსტიტუციაში ჩაბმულ ქალებს ფართებს გარკვეული თანხის სანაცვლოდ სისტემატურად გადასცემდნენ.
გამოძიების თანახმად, დაკავებულები ასევე უზრუნველყოფდნენ მომსახურების მსურველ მამაკაცთა მოზიდვას, პროსტიტუციით მიღებული თანხების მიღებასა და შემდგომ განაწილებას, რითაც პირთა პროსტიტუციაში მონაწილეობას ხელს უწყობდნენ.
პოლიციამ გამოძიების ფარგლებში 7 პირი ბრალდებულის სახით დააკავა და უკანონო საქმიანობასთან კავშირში მყოფი 12 ობიექტი დახურა. აღნიშნულ ობიექტებში დასაქმებული ქალები სამართალდამცველებმა გამოკითხვისა და შემდგომი სამართლებრივი პროცედურების განხორციელების მიზნით პოლიციაში გადაიყვანეს.
ფაქტზე გამოძიება სისხლის სამართლის კოდექსის 254-ე მუხლით მიმდინარეობს, რაც პროსტიტუციის ხელშეწყობასა და პროსტიტუციისთვის ადგილის გადაცემას გულისხმობს და 4 წლამდე ვადით თავისუფლების აღკვეთას ითვალისწინებს.
