შინაგან საქმეთა სამინისტროს ინფორმაციით, სამართალდამცველებმა ბათუმში განზრახ მკვლელობის მცდელობისა და ცეცხლსასროლი იარაღის უკანონო შეძენა-შენახვა-ტარების ბრალდებით ერთი პირი – 1984 წელს დაბადებული რ.დ. ცხელ კვალზე დააკავეს.
გამოძიების მონაცემებით, ბრალდებულმა ბათუმში, ურთიერთშელაპარაკების ნიადაგზე დაწყებული დაპირისპირებისას, ცეცხლსასროლი იარაღიდან გასროლით დაჭრა ნაცნობი, 1977 წელს დაბადებული გ.ბ. დაშავებული კაცი საავადმყოფოში გადაიყვანეს, თუმცა მისი გადარჩენა ვერ მოხერხდა და იგი მალევე გარდაიცვალა.
შსს-ს ცნობით, პოლიციამ შემთხვევის ადგილზე ამოიღო დანაშაულის ჩადენის იარაღი, როგორც ნივთმტკიცება.
გამოძიება სისხლის სამართლის კოდექსის 19-108-ე მუხლით (განზრახ მკვლელობის მცდელობა) და 236-ე მუხლის მე-3 და მე-4 ნაწილებით (ცეცხლსასროლი იარაღის უკანონო შეძენა, შენახვა და ტარება) მიმდინარეობს. დანაშაულები 15 წლამდე თავისუფლების აღკვეთას ითვალისწინებს.
