აჭარის უმაღლესი საბჭოს არალეგიტიმურმა თავმჯდომარემ “აჭარა თაიმსთან” საუბრისას განაცხადა, რომ არალეგიტიმური მინისტრთა კაბინეტის შემადგენლობაში ცვლილებები არ იგეგმება.
დავით გაბაიძის განცხადების თანახმად, მინისტრთა კაბინეტს უხელმძღვანელებს არალეგიტიმური თავმჯდომარე სულხან თამაზაშვილი და მასთან ერთად მუშაობას გააგრძელებს მოქმედი, ასევე არალეგიტიმურად შერჩეული მინისტრები.
„მთავრობის პერსონალურ შემადგენლობაში ამ ეტაპზე ცვლილება არ გვაქვს. შაბათ კვირას მთელი დღის განმავლობაში ვიმუშავებთ და ორშაბათს დამტკიცების პროცედურები გაიმართება, სადაც მოვუსმენთ თავმჯდომარეობის კანდიდატს, ასევე, მინისტრებს,“ – განაცხადა დავით გაბაიძემ.
ინფორმაციისთვის: პლენარული სხდომა, რომელზეც არალეგიტიმური აღმასრულებელი ხელისუფლების დაკომპლექტება მოხდება, ორშაბათს, უმაღლეს საბჭოშია დაგეგმილი. სხდომაზე თვითგამოცხადებული დეპუტატები დაამტკიცებენ როგორც არალეგიტიმურ მინისტრებს, ასევე თავმჯდომარეს.
ცნობისთვის: აჭარის მთავრობის არალეგიტიმურმა თავმჯდომარემ გადადგომის შესახებ საზოგადოებას სოციალური ქსელით აცნობა. თორნიკე რიჟვაძემ მადლობა გადაუხადა „ქართული ოცნების“ ლიდერებს, ასევე, მხარდამჭერებს და აღნიშნა, რომ რჩება პარტიის ერთგულ წევრად.
