ბათუმის საკრებულოს წევრი გიორგი ლომთათიძე 2021 წლიდან დღემდე „ქართული ოცნების“ დეპუტატია. ამავე პერიოდში, 2021-2025 წლებში, მის ოჯახთან დაკავშირებულმა კომპანიამ „კომპასი ჯ.კ“-მ სახელმწიფო ტენდერებიდან 3,848,985 ლარის ღირებულების 14 კონტრაქტი მოიგო.
მანამდე, 2019-2021 წლებში, კომპანიას ტენდერებიდან მიღებული ჰქონდა 762,432 ლარი. ჯამში, ბოლო 7 წლის განმავლობაში „კომპასი ჯ.კ“-ის შემოსავალმა ტენდერებიდან 4,614,417 ლარი შეადგინა.
„საერთაშორისო გამჭვირვალობა საქართველოს“ კვლევის თანახმად, კომპანიის 100%-იანი წილის მფლობელი და დირექტორი გიორგი ლომთათიძის სიძე, გიორგი ხელაძეა. თავდაპირველად კომპანია ლომთათიძის დას – ეკატერინე ლომთათიძეს ეკუთვნოდა, შემდეგ კი მამას, დამირ ლომთათიძეს, რომელმაც 2019 წელს წილი უსასყიდლოდ გადასცა სიძეს. კომპანია ძირითადად სამშენებლო სამუშაოებთან დაკავშირებულ ტენდერებში მონაწილეობს.
აღსანიშნავია, რომ 1,084,272 ლარის ღირებულების 3 ტენდერი „კომპასი ჯ.კ“-მ ბათუმის მუნიციპალიტეტის მიერ დაფუძნებული იურიდიული პირებისგან მიიღო. ეს გარემოება კითხვებს აჩენს ინტერესთა შესაძლო კონფლიქტთან დაკავშირებით, რადგან საკრებულოს წევრის ერთ-ერთი ფუნქცია სწორედ მუნიციპალიტეტის სტრუქტურების კონტროლია.
კიდევ უფრო მეტი კითხვა გაჩნდა „ბათუმის ბულვართან“ დაკავშირებულ ტენდერებზე. კომპანიამ ამ უწყების მიერ გამოცხადებული 420,878 ლარის ღირებულების 2 ტენდერი მოიგო. ამ დროს კი ბულვარის დირექტორის მოადგილე და სატენდერო კომისიის წევრი გიორგი ლომთათიძის მეუღლე სოფიკო გუჯაბიძეა.
დოკუმენტების მიხედვით, გუჯაბიძემ ორივე შემთხვევაში დაადასტურა, რომ მას და კომპანიას შორის ინტერესთა კონფლიქტი არ არსებობდა, თუმცა აღნიშნული ფაქტები დამატებით კითხვებს აჩენს საჯარო ინტერესისა და შესაძლო გავლენების შესახებ.
