„ძლიერი საქართველო – ლელო“ აცხადებს, რომ პასუხისმგებლობით ეკიდება როგორც საზოგადოების ნდობას, ისე ოპოზიციური კოორდინაციის ნებისმიერ ფორმატს. პარტიის მიერ გავრცელებულ განცხადებაში ნათქვამია, რომ მათი მიზანი უცვლელია – ქვეყანაში მმართველი სისტემის დემოკრატიული ცვლილება მშვიდობიანი გზით, არჩევნების საშუალებით.
როგორც პარტიაში განმარტავენ, პოლიტიკური პასუხისმგებლობა მათ ავალდებულებს, თითოეული ინიციატივა შეფასდეს არა ემოციურად, არამედ სტრატეგიულად. „ძლიერი საქართველო – ლელო“ პროდასავლური პარტიების თანამშრომლობას მიიჩნევს შედეგზე ორიენტირებულ და პრაგმატულ აუცილებლობად, თუმცა ამავე დროს ხაზს უსვამს, რომ საზოგადოებას უნდა ჰქონდეს ალტერნატიული არჩევანი ოპოზიციურ სპექტრშიც.
განცხადებაში აღნიშნულია, რომ პოლიტიკური გაერთიანება უნდა ეფუძნებოდეს ნდობას, თანმიმდევრულობასა და შეთანხმებების შესრულების პრაქტიკას. პარტია იხსენებს ბოლო წლებში შეთავაზებულ სხვადასხვა ერთობის ფორმატს, რომლებიც, მათი შეფასებით, ვერ განხორციელდა, რის შედეგადაც დაზიანდა როგორც თავად იდეა, ისე საზოგადოების ნდობა მთლიანად ოპოზიციური სპექტრის მიმართ.
პარტიის პოზიციით, ერთობა არ უნდა იყოს თვითმიზანი და ის მხოლოდ ინსტრუმენტია კონკრეტული პოლიტიკური მიზნის მისაღწევად. „ძლიერი საქართველო – ლელო“ აცხადებს, რომ ძლიერი ოპოზიცია იქმნება კონკურენტული მრავალფეროვნებით და არა იძულებითი ერთგვაროვნებით, ხოლო ყველა პოლიტიკური ძალის „ერთ ქვაბში მოქცევა“ ამარტივებს ოპონენტის ნარატივს და ამცირებს ალტერნატივის ხარისხს.
განცხადების მიხედვით, პარტია მზად არის კოორდინაციისა და თანამშრომლობისთვის საერთო ეროვნულ ინტერესებთან დაკავშირებულ საკითხებზე და ქმედით სამოქმედო ფორმატებში, თუმცა აგრძელებს პოზიციონირებას, როგორც დამოუკიდებელი პოლიტიკური სუბიექტი.
