„ქართული ოცნების“ ბათუმის მუნიციპალური ინსპექცია უნებართვოდ განთავსებული შენობების დემონტაჟს აგრძელებს. მორიგი შემთხვევა გუშინ თევზის ბაზრის მიმდებარე ტერიტორიაზე დაფიქსირდა, სადაც სანაპირო ზოლში არსებული მშენებარე ნაგებობა დაანგრიეს.
დემონტაჟის პარალელურად ადგილზე იმყოფებოდნენ როგორც უკვე მოქმედ ობიექტებში დასაქმებულები, ასევე შენობების მფლობელები. მათი განცხადებით, არსებობს მოლოდინი, რომ მუნიციპალური ინსპექციის შემდეგი გადაწყვეტილება მათ ობიექტებს შეეხება, რის გამოც პროცესს პროტესტით შეხვდნენ.
ადგილზე მყოფი პირები აცხადებენ, რომ მიღებულ გადაწყვეტილებას შეეწინააღმდეგებიან და მიიჩნევენ, რომ პროცესი არ არის მხოლოდ უნებართვო მშენებლობებთან დაკავშირებული. დასაქმებულების ნაწილის შეფასებით, დემონტაჟი შესაძლოა უკავშირდებოდეს ე.წ. ხელოვნური კუნძულის პროექტს, რადგან მათი ობიექტები სწორედ მისასვლელ ტერიტორიაზე მდებარეობს და არსებობს ვარაუდი, რომ აღნიშნულ ზონაში არსებული ნაგებობების შენარჩუნება არ სურთ.
მუნიციპალური ინსპექციის საქმიანობის შერჩევითი მიდგომი ეჭვებს იწვევს. უწყება განსაკუთრებულ სიმკაცრეს იჩენს იმ პირების მიმართ, ვისაც მმართველ პარტიასთან გავლენიანი კავშირები არ აქვთ. მაღალჩინოსნების უკანონო მშენებლობებზე კი რეაგირება ფაქტობრივად არ ხდება.
„აჭარა თაიმსმა“ კონკრეტული მაგალითების ნაწილი დაასახელა. კერძოდ, ბათუმის ბულვარში „ამბასადორის“ უნებართვო მშენებლობა, მერიის მიმდებარედ, დეპუტატ გია ჭყონიას უნებართვო სამუშაოები, ასევე ხელვაჩაურის ყოფილი მერის, ჯუმბერ ვარდმანიძის საცხოვრებელი სახლი, რომელმაც უკანონოდ აშენდა.
აღნიშნულ ფაქტებზე კითხვები „აჭარა თაიმსმა“ მუნიციპალური ინსპექციის უფროსის მოადგილეს დაუსვა, რაზეც პასუხები ვერ მივიღეთ.
