თბილისსა და ბათუმს შორის სარკინიგზო მიმოსვლაში მგზავრობის დრო მნიშვნელოვნად შემცირდა.
საქართველოს რკინიგზის გენერალური დირექტორის, ლაშა აბაშიძის განცხადებით, დღეიდან ორივე მიმართულებით მგზავრები დანიშნულების ადგილამდე ოთხ საათში ჩავლენ, მაშინ როდესაც აქამდე მგზავრობას დაახლოებით 5 საათი და 30 წუთი სჭირდებოდა.
აბაშიძის განმარტებით, დროის შემცირება შესაძლებელი გახდა სარკინიგზო ინფრასტრუქტურაზე ჩატარებული კაპიტალური სამუშაოების შედეგად. მისი თქმით, რეაბილიტირებულ მონაკვეთებზე მოიხსნა სიჩქარის შეზღუდვები, რამაც მატარებლების უფრო სწრაფი და უსაფრთხო გადაადგილების შესაძლებლობა შექმნა.
საქართველოს რკინიგზის ხელმძღვანელის ინფორმაციით, პარალელურად გრძელდება სადგურების განახლების პროცესიც. მისი თქმით, უკვე დასრულებულია რამდენიმე სადგურის რეაბილიტაცია, ამჟამად კი სამუშაოები 5-7 სადგურზე მიმდინარეობს. კომპანიაში აცხადებენ, რომ წლის ბოლომდე კიდევ ხუთი სადგურის რეაბილიტაციის დაწყება იგეგმება, ხოლო მომავალი წლისთვის როგორც მაგისტრალურ, ისე საგარეუბნო სადგურებზე სამუშაოების სრულად დასრულებას გეგმავენ.
