“ნაციონალური მოძრაობის” ინფორმაციით, ხვალ, დედაქალაქში “ოცნების” მიერ დაანონსებულ აქციაზე სტუდენტები და ლექტორები იძულებით მიჰყავთ.
ნიკა ქაშიბაძემ ბრიფინგზე განაცხადა, რომ ხელისუფლრბა იძულებასა და მუქარას სხვადასხვა ფორმით ახორციელებს.
“ბათუმის შოთა რუსთაველის სახელობის სახელმწიფო უნივერსიტეტისა და საზღვაო აკადემიის ლექტორები, ასევე, სხვადასხვა სტრუქტურებში დასაქმებული ადამიანები აძალებენ აქციაზე წასვლას სტუდენტებს, კონკრეტულად თვითმმართველობების საშუალებით და ვიცით, რომ საიდუმლო არაა რომ დიდი ხანია “ქართულ ოცნებას” ჰყავს დაკომპლექტებული.
აიძულებენ, რომ თბილისში გასამართ ღონისძიებას დაესწრონ, წინააღმდეგ შემთხვრვაში ნიშნებს არ დაუწერენ, პრობლემას შეუქმნიან სასწავლო პროცესში, რაც ზეწოლაა, თუმცა დარწმუნებული ვარ, რომ ის სტუდენტები რომლებიც იძულებული იქნებიან ხვალ იმ ღონისძიებაზე წავიდნენ, ისინიც ოპოზიციურად არიან გაწყობილი და გამოუტანენ “ქართულ ოცნებას” განაჩენს. რაც შეეხება დაშინებას, იმ უმსგავსო საქციელს რასაც ბათუმის უნივერსიტეტი და საზღვაო აკადემია კადრულობს, დარწმუნებული ვარ, რომ ამაზე მათივე სტუდენტები გასცემენ პასუხს. მათი ყველა ეს მცდელობა იქნება ამაო, რადგან ახალგაზრდებში მასიურად არის გავრცელებული ის აზრი, რომ “ქართული ოცნება” რუსული ძალაა და აუცილებლად უნდა წავიდეს ხელისუფლებიდან. ქვეყნის მომავალი არის ევროპაში და ეს სტუდენტებმა დაამტკიცეს, როდესაც ერთერთი ყველაზე დიდი გაფიცვა ვიხილეთ აჭარის ისტორიაში, როდესაც ვნახეთ ბათუმის უნივეტსიტეტისა და საზღვაო აკადემიის სტუდენტები გაიფიცნენ. მაშინ რექტორებს მოუწიათ სტუდენტების აზრის გათვალისწინება,” – განაცხადა ნიკა ქაშიბაძემ.
ინფორმაციისთვის: 23 ოქტომბერს თბილისში, თავისუფლების მოედანზე „ქართული ოცნების” საარჩევნო კამპანიის დასკვნითი ღონისძიება გაიმართება, ამის შესახებ ინფორმაციას პარტია ავრცელებს. მმართველი პარტიის ცნობით, ღონისძიება 16:00 საათზე დაიწყება.
”აჭარა თაიმსი” პოზიციისთვის უნივერსიტეტების ადმინისტრაციებს დაუკავშირდა, კომენტარის გაკეთების შემთხვევაში მასალა განახლდება.
