ბათუმის საქალაქო სასამართლოში მზია ამაღლობელის ადმინისტრაციულ საქმეზე დაგეგმილი სხდომა გადაიდო და განხილვა 11 მაისს გაგრძელდება.
სასამართლოში პროცესის დაწყება ვერ მოხერხდა, რადგან თავად ამაღლობელი სხდომაზე არ გამოცხადდა, ხოლო მისმა ადვოკატმა გადადების შუამდგომლობა დააყენა.
პარალელურად, შსს-ს წარმომადგენელმა ყურადღება გაამახვილა ადვოკატის უფლებამოსილების დამადასტურებელ დოკუმენტებზე და აღნიშნა, რომ წარმოდგენილი მასალა არასრულყოფილი იყო.
მოსამართლე ალექსანდრე გოგუაძემ განმარტა, რომ ადვოკატს მხოლოდ ორდერი ჰქონდა წარდგენილი და მინდობილობის არარსებობამ პროცედურული ხარვეზი წარმოშვა. მიუხედავად ამისა, მოსამართლემ აღნიშნა, რომ აღნიშნული გარემოება პროცესის გაჭიანურების მცდელობად არ მიიჩნევა.
საქმე ეხება მზია ამაღლობელის დაკავების კანონიერების შეფასებას. ეს საკითხი ბათუმის საქალაქო სასამართლოს ქუთაისის სააპელაციო სასამართლოს გადაწყვეტილებით დაუბრუნდა განსახილველად.
მომდევნო სხდომა 11 მაისს, 14:00 საათზე გაიმართება.
