„ქართული ოცნების“ შინაგან საქმეთა სამინისტრომ პარლამენტს საკანონმდებლო ცვლილებათა პაკეტი წარუდგინა, რომლის მიღების შედეგად შსს აკადემიას საშუალება მიეცემა საბაკალავრო დონეზე საზოგადოებრივი უსაფრთხოებისა და საპოლიციო საქმის პროგრამა განახორციელოს. ცვლილებები „უმაღლესი განათლების შესახებ“ კანონში და თანმდევ აქტებში უკვე შეტანილია და პარლამენტში განხილვის ეტაპზეა.
პოლიციის აკადემიაში ასეთი ტიპის უმაღლესი საგანმანათლებლო პროგრამა პირველად იქმნება. სამწლიანი კურსი მოიცავს ფიზიკურ, ტაქტიკურ და საცეცხლე მომზადებას, სპეციალურ საგნებს, რომლებიც საზოგადოებრივი უსაფრთხოების და საპოლიციო საქმიანობის სხვადასხვა მიმართულებას ეხება.
პროგრამის დასრულების შემდეგ სისტემას შეემატება ბაკალავრის დიპლომის მქონე კვალიფიკაციის სპეციალისტები – გამომძიებლები, პატრულ-ინსპექტორები, მართლწესრიგის ოფიცრები, დეტექტივები, მესაზღვრეები და ექსპერტ-კრიმინალისტები.
საბაკალავრო პროგრამაზე მიიღებენ პირებს, რომლებიც შეასრულებენ პოლიციაში სამსახურისთვის კანონით განსაზღვრულ მოთხოვნებს და წარმატებით ჩააბარებენ ერთიან ეროვნულ გამოცდებს. სტუდენტთა სწავლას სახელმწიფო დააფინანსებს შინაგან საქმეთა მინისტრის მიერ დადგენილი წესით.
პროგრამაში ჩარიცხვისთანავე სტუდენტს მიენიჭება უმცროსი სპეციალური წოდება – რიგითი, ხოლო კურსის დასრულებისას – საშუალო სპეციალური წოდება, ლეიტენანტი. სწავლის პერიოდი ჩაითვლება სამსახურის სტაჟში. მომავალ პოლიციელებს აკადემია უზრუნველყოფს საჭირო ინვენტარით, სასწავლო მასალით, კვებითა და უნიფორმით. მათთვის ხელმისაწვდომი იქნება საერთო საცხოვრებელიც, ასევე სოციალური და სამართლებრივი გარანტიები, რომლებიც მოქმედი პოლიციელებისთვის არის განსაზღვრული.
