პოლონეთი საქართველოს მოქალაქეებისთვის სამუშაო ვიზების გამარტივებულ წესს აუქმებს, ინფორმაცია პოლონეთის საელჩომ გაავრცელა.
ახალი წესით, პოლონეთის ოჯახის, შრომისა და სოციალური პოლიტიკის მინისტრის ბრძანება ადგენს იმ ქვეყნების ჩამონათვალს, რომელთა მოქალაქეებს კვლავ შეეძლებათ „უცხოელისთვის სამუშაოს მინდომების შესახებ განცხადების“ მექანიზმით სარგებლობა. სიაში სომხეთი, ბელარუსი, მოლდოვა და უკრაინა დარჩა, საქართველო კი ჩამონათვალიდან ამოიღეს.
გადაწყვეტილება ნიშნავს, რომ საქართველოს მოქალაქეები პოლონეთში მუშაობის დაწყებისთვის ვეღარ მიიღებენ ნებართვას გამარტივებული რეჟიმით. თუმცა, ისინი, ვინც უკვე მუშაობენ ან განცხადება ბრძანების გამოქვეყნებამდე შეიტანეს, შეუძლიათ საქმიანობის გაგრძელება ადრე მოქმედი წესით – ვადის ამოწურვამდე.
მანამდე, პოლონელ დამსაქმებლებს საქართველოს, სომხეთის, მოლდოვის, უკრაინისა და ბელარუსის მოქალაქეების შერჩევა 24 თვემდე ვადით მარტივი დეკლარაციით შეეძლოთ, სამუშაო ნებართვის აღების გარეშე. დამატებით, აღნიშნული ქვეყნების მოქალაქეებს 9 თვემდე სეზონური საქმიანობის განხორციელებაც ჰქონდათ ნებადართული.
საბოლოო გადაწყვეტილებას წინ უძღოდა აგვისტოში წარდგენილი კანონპროექტი, რომელშიც აღნიშნული იყო, რომ ცვლილება განაპირობა საქართველოში პოლიტიკური პროცესებმა, უვიზო რეჟიმთან დაკავშირებულ პოტენციურ რისკებზე დაწყებულმა მუშაობამ და 2024 წელთან შედარებით გაცემული დეკლარაციებისა და სეზონური ნებართვების შემცირებამ.
